芫茜皮蛋豆腐下火湯

屋企邪媽自細教落,火有虛實之分。實火即係一般人講嘅熱氣,通常係食啲煎炸熱氣嘢多所致,症狀就係喉嚨痛、谷暗瘡或甚至便秘等,處理比較簡單,煲啲清熱湯水,甚至去涼茶鋪整碗夏枯草、廿四味,更甚至乎食個雪梨、雪蕉都可以清熱,好快無事。

而虛火就最麻煩,通常係挨夜多,休息唔夠,加上生冷嘢食得多谷起上嚟嘅。例如我呢幾晚睇書睇夜咗,加上天口熱喪食雪糕,喪飲可樂,結果就嚟料啦。一覺醒嚟,你發覺某舊牙肉腫咗成舊,又酸又痛,痛到嘢都食唔到嘅,就係虛火所致。呢種情況睇牙醫都無用,因為用西醫嘅概念,佢淨係話你發炎,求其比啲止痛藥你等你自己慢慢好,咁樣嘅話分分鐘拖一頭半個月都未好咖,嗰一頭半個月入面牙肉痛到食又食唔到,瞓又瞓唔到,真係生不如死。所以呢啲時候就要靠中醫啦,喺香港嘅話,乜都唔識嘅可以去搵中醫師把下脉,執返兩濟下火湯水補鑊,屋企阿媽識嘅,通常會煲咸魚頭滑石湯,或者淡菜咸廋肉粥,同時自己清淡飲食,戒生冷嘢嘅話,一般三五日內都可以解決嘅。

咁如果身在海外,孤家寡人,周身唔得閒,又咩材料都搵唔到時,點算呢?唔怕嘅,我仲有一招更簡單嘅,芫茜皮蛋豆腐湯。基本材料就五樣:芫茜、皮蛋、豆腐、鹽、水,需時不過二十分鐘。簡單易起貨,絶對係居家旅行,殺人放火嘅必備良藥,就以喺澳洲為例,豆腐同芫茜系鬼佬超市一定有,皮蛋喺唐人街有。話說以前 working holiday 時要入深山野嶺嘅細鎮仔做嘢時,我都必定帶定盒皮蛋傍身,就喺怕虛火上時搵唔到皮蛋。

做法好簡單:一到兩碗水,大火煲起佢,水冷時先落皮蛋同豆腐。芫茜切碎佢,等水滾開之後落,同時落大量嘅鹽,份量自己因啦,總之唔好咸到唔食得就OK, 因為鹽都有下火鎮痛嘅作用,朝早起身牙肉痛時,沖杯鹽水飲下都可以減輕下症狀咖。咁芫茜落左,個湯滾多五到十分鐘就可以起貨。因為屋企老人家教落,生滾湯嘅嘢,越滾越熱氣,平時住家湯水無問題,但而家作藥用就免啦。

圖片來源:作者

圖片來源:作者

個湯滾好之後,連湯連渣同我食曬佢,牙痛咬唔到嘅生吞都要同我吞咗佢(所以啲芫茜要切碎囉),症狀輕嘅,通常一劑見效,可能朝早食咗,晚上已經散曬嘅啦。症狀重嘅,食完一劑通常第二日已經無咁痛咖喇,係咁KEEP住食多兩三劑。 期間要戒口,酸辣生冷一概禁食,同埋最後一樣,早啲訓啦,仆街。

咁呢個湯呢,除左藥用之外,仲可以作為平時家常湯水或者邊爐湯底架,同樣嘅方法,加啲肉片或者魚片一齊滾,中意嘅再落小小鷄粉吊下味,一樣過癮。

所謂在家靠父母,出門靠朋友。但更多時候,係要靠自己嘅,人啊,就係要夠硬淨,先可以生存落嚟,所以呢啲基本嘅生存技巧,係一定要識,就咁。
旁門左味者,邪也~

ming@ming82.com'

黃邪

黃書最好讀, 邪性最難馴。 Blog: http://wongchea.blogspot.com.au/ (見下)

More Posts - Website

Follow Me:
Facebook

高人指點

comments