冇女朋友,你咁快學做好男友做咩?

愛的發聲練習劇照

有好多人會有一個諗法:我明明係一個好仔,點解硬係搵唔到女朋友?可能你識煮飯、會做家務、人又細心、會知幾時準備驚喜,或者你真係具備哂所有做一個好男友嘅條件。

但係你根本冇女朋友。

當你有女朋友,你係佢最重要嘅人之一,生活上多咗好多接觸機會,自然比到好多時間你盡顯完美男友嘅一面;但如果你鍾意咗一個女仔想追佢,你冇可能將同一套方法套用落去,一嚟你同佢未必喺一個相同嘅圈子,二嚟好多行為男朋友做係Sweet,其它人做就會太Over:你冇可能無啦啦話煮餐飯比個普通人食係咪?

但係好多人唔明依個道理,佢地以為只要令自己愈接近女性心目中嘅好男人,自己拍到拖嘅機會就愈大。問題你唔係嗰種一出場就吸引到全場目光嘅男神級數(我假設你唔係啦下),令人窩心嘅行為唔一定馬上吸引到女性,而追女仔你更加需要嘅係主動、浪漫、幽默,令一個女性喺最短時間之內對你有好感,留低一個深夜嘅印象,而唔係要相處落幾個月之後先慢慢感受到你嘅好,知你有幾無微不至。通常佢未發掘到你嘅優點,已經成為咗另一個人嘅女朋友。

點解咁多女性會愛上壞男人?因為佢地有自信,有魅力,只係見過幾次面足已令到女性對佢產生好感,然後再據為己有。可能一齊之後佢對女朋友好差,唔理女朋友感受,甚至繼續追女仔,做盡大家口中賤男會做嘅事。但起碼人地追到女拍到拖,唔識或者唔會去維持係後話,對佢嚟講大不了飛咗而家依個搵下一個,但你就連一次拍拖嘅機會都冇。

你識嘅嘢只係可以維持一段關係,但幫唔到你發展一段關係。

我唔係話你要做賤男或者有個壞男人嘅風格先追到女仔,但你一定要明白點解好男仔都唔一定會拍到拖嘅原因。喺一個講求速食嘅慍界,如果乜都要慢慢發掘,乜都要細心感受先發現,你要拍拖真係唔係一件易事——係吖,機會當然有嘅,但細啲囉。

所以唔好再學做一個一百分男友,唔好再以暖男自居,你需要嘅唔係一個女仔喺你身邊耐咗先會覺得暖,而係第一次見你已經感受到你嘅吸引力。

而且最令女仔感動嘅就係一個男人為咗自己而改變。如果你一開始已經咁好,改條毛?

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments