《地厚天高》觀後感與反思

終於,喺2017年嘅最後嘅一場,我睇到《地厚天高》。坦白講,呢部紀錄片係我連極業餘嘅觀後感都難寫嘅,我相信對唔少非圈內、無親身喺佢哋身邊經歷過嘅人嚟講,即使係比我專業、寫開影評嘅人,都係咁睇。一套出色嘅紀錄片,本身就係一個時間段入面一連串事件嘅summary,根本無可能再summarize一次。不過,喺講我對自己呢幾年嘅反思前,為呢部紀錄片講幾句都係應盡之義。

首先,Nora Lam真係一個好出色嘅紀錄片導演(唔好意思,其實我未睇《未竟之路》)。佢想做到嘅效果,紀錄梁天琦人性嘅一面,好成功。插播嘅唔同片段、歌曲都好適合。事件嘅發生,相信大家都清楚,唔清楚嘅都係入場自己睇啦,我想講人。梁天琦,係一個dreamer。喺佢講佢嘅三年hall生活,為hall奉獻一切,不求回報嘅時候,就將佢作為一個dreamer嘅特質顯露無遺,好容易可以理解到佢點解可以為香港做咁多嘢。只有一個dreamer先可以motivate到其他人,先有可能成就其他人成就唔到嘅事。人,係應該先向自己負責任,無理由捨棄親近嘅人去為立場唔一樣嘅人犧牲。所以,我唔係想叫梁天琦繼續企出嚟做大家嘅偶像、英雄,我係想話,客觀、冷靜、抽離呢啲嘢,留番俾其他人做就得喇,因為dreamer罕有,而且係達成非凡成就所必須嘅。無論你嘅目標係咩,記住為Hall奮鬥果個你就得。

除咗梁天琦,仲有代佢參選嘅巴治奧梁頌恆。梁頌恆係一個幾務實嘅人,短短嘅coverage已經令我睇到佢其實係一個幾值得信賴、好穩陣嘅執行者,難怪佢可以搞到個青年新政出嚟。我幾鍾意佢。黃台仰同樣係一個幾有趣嘅人,其實兩個黨咁多個台前人物我最早喺facebook交流過嘅就係佢,我諗佢自己都唔記得有人不斷challenge佢點解buy陳云果套咩華夏乜乜乜,其實我喺challenge佢之前,知道佢buy陳雲之前,已經好欣賞佢。睇完《地厚天高》,我真係幾想攬下梁頌恆同黃台仰,再同梁天琦講下「千祈唔好摺埋自己,一定要搵人傾下,對減壓同抑鬱都好有幫助」。

之後,就係我對自己呢幾年嘅回憶,同電影無關。各位可以飛去睇最後一句。

其實我係一個同梁天琦完全相反嘅人。抽離、理智對我嚟講係本能,分析、判斷係我強項,要motivate人對我嚟講係極困難。目標為本,未至於無把握嘅嘢唔做,但同目的無關嘅一定唔做。雖然我係一個80後(仲大巴治奧少少),但我從來無去過六四晚會,甚至2012年前連七一遊行都無行過,亦無大中華過。唔洗睇論述都知佔中係低能嘅,所以對新一代著重論述,甚至有唔少人曾經被陳雲昆過覺得好神奇。喺本民前、青政堀起嘅雨傘革命,其實我嘅參與只有927到930四日,927、928出入金鐘幾次,929、930由天后行到金鐘再行番去銅鑼灣。喺黃之鋒開路、張超雄阻升級、學聯跣到抗爭者被黑警暴打之前已經知結果,一早已經放棄。

知有本民前同青政存在之後,終於搵到理念相同嘅本民前,之後發現Ray Wong竟然buy陳雲,轉去撐青年新政。不過作為一個抽離嘅圈外人,直至15年區選完我先知有梁頌恆呢個人,之前我淨係知游蕙禎唔太受中女師奶歡迎。

再之後我終於有機會投入少少。警察煽動嘅魚蛋事件我仍然無喺旺角,不過之後係我十幾年嚟第一次捐錢。雖然作為一個年過30嘅80後我無跨區出力去撐梁天琦,但我睇得好透徹,知道我完全認同本民前,甚至喺某女神級女演員隱晦話支持7號嘅時候我好坦白留言「道不同」(離題講一句,三個我最欣賞嘅女演員都有喺雨革同之後不畏強權同香港人企喺同一陣線,話宜家嘅藝人不如8、90年代嘅老海鮮唔該收皮)。

之後就到2016年嘅立法會選舉。雖然我喺被遺棄選區,仍然難得地想出力支持本民前、青政。以我嘅年紀、性格,企街站、庇護工場貼選舉通涵唔啱我,唯有私底下透過page同游蕙禎講句如果要人幫手度橋即管出聲,可惜佢無搵我幫手(其實三唔識七如果佢哋肯放人埋身幫手度橋我都擔心)。第一場選舉論壇後更加明顯需要人幫手,可惜可能我真係唔太主動直接,淨係問過幾個網友識唔識人介紹我去直接幫手預備對答、辯論,最後我都係幫唔到手。成個2016立法會選舉我唯一嘅貢獻就係最後關頭寫咗篇無咩人睇嘅文,反駁成報指控青年新政背後係劉迺強父子。

之後就係大家都知嘅當選、DQ事件。我同部分支持者唔同,我唔認為巴治奧同游蕙禎宣誓玩嘢有錯。作為一個用英文多過中文嘅人亦會話佢哋嘅發音明顯係Gina,唔係支那,我唔會對佢哋嘅原意作出不必要嘅揣測,即使我本人認為叫支那無問題。我對佢哋嘅支持由民族黨大會,到選舉論壇、造勢大會、當選、宣誓、被告,到今時今日都無變過。我仍然唔認同遊行嘅效果,特別係左膠主場,所以佢哋同黃台仰參與反釋法遊行呢個最後一次喺前線相遇嘅機會我都係錯過咗,不過我都有寫過下文講過其實香港法院喺宣誓案無需引用基本法104條以及相關釋法。

簡單講,我喺雨革前已經認同和理非無能,亦認同唯有武力先會有效果。我認同香港發展到咁已經無咩所謂泛民本土,只有統獨之分。最後我都係錯過咗同本民前一齊喺前線嘅機會,唔係我唔認同本民前,而係武力抗爭一樣要講策略,最低限度都要爭到主動權,唔可以被動用武力。立場、對現實嘅理解決定一切。無論如何,喺可見嘅將來,我對本民前同青政會同2016、2017年一樣支持。雖然未有並肩作戰嘅機會,對我嚟講本民前、青政嘅每一位都係戰友。

最後講番句,”Nora Lam,well done!And,thank you!”

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments