為咗女朋友,幾ON9都要做

cc photo by flickr user Jes

冇錯,你有幾錫一個女朋友,就會有幾ON9。

原因?你諗下唔係為咗女朋友會唔會喺AIA攬住隻公仔行落中環站返屋企;唔係為咗女朋友會唔會明知情人節出去食飯比人砍到一頸血都照比;唔係為咗女朋友會唔會凌晨三點挨眼瞓都拎住部電話傾?

冇錯,拍拖要講將來講性格講夾唔夾,但睇你肯唔肯為咗女朋友耐唔耐做個ON9仔都睇得出你有幾愛佢。烽火戲諸侯係ON9嘅極致,為搏條女一笑連江山都冇埋,後人都笑周幽王白痴,但冇人可以否認佢咁做真係好愛條女。當然你唔需要做到咁(你唔係皇帝,放山火邊忽浪漫),而家只要你敢喺行人專用區著住件Hello Kitty公仔衫同條女影即影即有,我包保佢開心到暈,即刻FB同IG曬命話你依個男朋友有幾好——當然你朋友會毫不餘力咁笑一餐。

男人最著重嘅係形象,我就算落街買個M記都要戴頂帽換件衫先會出門口。當一個男人不顧形象做盡ON9嘢為搏紅顏一笑,證明喺佢心目中你已經重要過世俗人嘅眼光,只要你開心,比其它人當自己係小丑都冇所謂。有人話男人唔怕冇拖拍,十幾歲賣骨痺、廿幾歲賣樣賣上進、三十幾賣成熟紳士、四十打後賣佬味。任何時候男人都有吸引人嘅賣點,但依啲特點都只係一個男人喺經歷同學習之後去做一啲符合自己當下年紀該做嘅事。事實上男人點都會有大細路嘅一面:貪玩、低B、白痴,而依一面只會出現喺自己老死,仲有最愛嘅面前。

有時啲女朋友會話男朋友唔夠成熟,大唔透。當然有可能個男仔真係未達到你心目中對成熟嘅要求,但都有可能只係佢覺得對住你可以盡情放鬆自己,未拿捏到對住你做個ON9仔,幾時又應該做到一個比到安全感你嘅男人。就好似好多女人鐘意講嘅一句說話:唔好比女朋友太獨立,因為到時佢就冇需要你嘅理由。同樣道理,如果你男朋友對住你再冇大細路嘅一面,可能佢已經唔再對依段關係上心,又或者佢為咗你而承受緊想像唔到嘅壓力,根本享受唔到段戀情。

男朋友就係一種咁ON9嘅生物:為咗你,佢會做好多平時死都唔會做嘅事,又或者係盡情喺你面前做返大唔透嘅男仔,如果你男朋友係一個咁嘅人,恭喜你,我唔可以肯定佢係咪好仔,但起碼佢真係好愛你。

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments