浮誇檸檬大戰素食L

雖然我對呢位基本上由細浮誇到大嘅80後同輩不嬲興趣不大,不過今次我就撐佢多過大陸網民喇。話說今次佢同馬雲撞橋,搞咗個名廚挑戰賽挑戰佢呢個被娛樂圈中廚藝高手恥笑嘅浮誇業餘準高手廚師。雖然正如歌唱比賽,神級高手好似張學友咁係唔會玩嘅,不過都仲有側田、李克勤之流睇錢份上去玩下,今次出事嘅就係睇中中國14億市場嘅紐約新星vegan chef。據聞喺紐約真係幾出名,因為佢開檔前咁啱唯一嘅vegan chef撤出咗紐約市,佢做獨市生意…不過紐約市滿足唔到佢,所以佢就展開尋根之旅。新世代當然好清楚,要喺強國打響名堂,當然要借據聞有過億人睇過嘅chok界教父謝霆鋒上位。今次件關公事件我又真係覺得檸檬無錯。

網上流傳版本係喺比賽嘅時候vegan chef被要求同對手交換菜式,而vegan chef唔識煮肉,亦聲稱producer答應咗佢唔會要求佢煮肉,所以拒絕交換。檸檬同監製溝通後決定踢佢出局。原本呢件係極正常嘅事,不過兩個重點就令件事變成關公災難:1. 素食撚。2. 中國。

眾所週知,無論日本同歐洲各國都好重視專業精神,不過呢樣嘢真係五千年中國文化都無。作為一個專業廚師,係需要識處理任何食材,任何menu上有嘅菜式。甚至唔係專業廚師,而係業餘入面可以參加烹飪比賽勝出嘅廚師都有呢個能力,包括香港嘅《美女廚房》出現過嘅高手好似蘇玉華、楊崢,Gordon Ramsay嘅Masterchef 每季有得爭獎嘅選手。喺Fanpiece相關文章我亦見到有留言話Masterchef有素食選手參賽,仲煮肉煮得好叻。咁的而且確,廚師嘅飲食習慣同佢作為一個廚師嘅專業精神無關。呢個世界上有唔少人唔食牛,唔少人唔食海鮮,都有唔少人唔食肉,但作為一個專業廚師仍然要識煮。你要參加一個廚藝比賽,而且唔係一個素食廚藝比賽,定位當然係所有菜式都要煮。所以,檸檬踢走佢其實好合理。不過,喺中國就會出事。

素食撚喺全世界都係咁恐怖,同耶撚、左膠、動保撚一樣,英文我哋叫fundamentalist,亦即係同恐襲同源。素食撚覺得唔煮肉叫有原則,咁當然,你好難要求fundmentalist有common sense,更加唔洗講專業精神。正如大律師唔可以揀客,醫生唔可以揀病人,廚師都唔可以揀菜式煮,呢啲就叫專業精神。如果你只係一個偏科廚師,咁你留喺自己嘅界別唔參加公開賽就無問題,但你偏偏要走去參加非素食比賽,自然要公平對待。你要求差別待遇,其實就即係要求特權。特權喺中國以外就只有殘障人士可以要求。雖然唔識煮肉的確係一個殘障廚師,但除咗喺中國呢個特權係常態、無專業精神、唔講公平嘅國家,真係好難成為關公災難。

呢個情況就好似一個痴肥肥佬走去audition cast superhero,同人講自己演技好好,但唔會除衫唔會操肌肉一樣。你講原則,可以,不過人哋講緊專業精神,講緊公平比賽。人哋鬥緊劇情片演技你話你拍笑片好搞笑?咁你咪去搵番個喜劇頒獎禮囉…

好喇講番聽講喺紐約好出名嘅vegan chef,紓尊降貴嚟指點業餘準高手、chok界教父檸檬。據聞重點係製作組答應俾特權佢但反口。我唔肯定,不過我絕對相信,真係一個chinese先會接受喺有特權嘅情況下同其他人「公平」比賽。人哋咩都要煮,海鮮、肉、碳水化合物、菜都無得揀,你話你淨係煮菜唔識煮肉唔識煮海鮮你都好意思落場比賽嘅?即係點?「我10秒淨係夠跑60米㗎咋,你俾我喺40米開跑,照計世界紀錄啦!」咁啊?

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments