無線頒獎禮又破下限

其實香港頒獎典禮圍威喂亂咁嚟就唔係淨係無線嘅,橫跨電影、音樂、電視都俾人嘈咗好多年,亦無人對無線個萬千星輝頒獎典禮有期望,不過今年特登延期兩個月嘅頒獎禮真係候選名單一出街就劣評如潮,破下限。

首先,我真係唔可以扮有追開頒獎禮,當然亦對網民果啲爆喊等如好演技應該攞獎係覺得幾低能,不過近幾年我印象中頒獎禮抵鬧真係有往績。最經典要數2012年,《天與地》只係攞咗最佳劇集一個獎,而事實上佢係比今年嘅《踩過界》更加應該橫掃哂男女主配角四大獎項,但最後只有佘詩曼憑葉梓恩一角入圍女主角五強,仲要輸俾楊怡…講起男主角,《天與地》係唯一一套無線劇真係有三大男主角,而唔同近幾年嘅劇無人知邊個係主角邊個係配角而且點解會有多於一個主角…講真,你問我林保怡演嘅鼓佬劉俊雄同陳豪演嘅黑仔宋以朗邊個演得更出色,我真係睇第二次睇到尾二果集都決定唔到,絕對係值得攞雙男主角嘅…咁當然,我比無線專業,我係唔會覺得主角獎可以係同劇兩個人一齊攞嘅,所以我會坦白講,我第二次睇《天與地》睇到完我嘅一票係投咗俾林保怡,而如果睇多一次我係好可能投番俾陳豪嘅…唔好誤會,黃德斌演嘅Ronnie 鄭振軒都好出色,起碼淨係佢對《大太監》嘅黎耀祥我肯定投黃德斌一票。而男女配角更加係無對手,朱慧敏演嘅Jessica,唔單止遠比《拳王》嘅胡定欣出色(其實胡定欣喺2011年《法證先鋒III》嘅演出亦遠比陳敏之《怒火街頭》嘅演出出色》),甚至我敢話數近十年嘅最佳女配角都無一個比朱慧敏嘅Jessica出色,包括陳法拉,不過,佢連提名都無。男配角更加誇張,果個係張國強,神級配角張國強,TVB無對手嘅張國強。佢演嘅Ben,係TVB有最佳男配角獎之後任何一個男配角都唔係佢對手,包括謝天華嘅Laughing、黃智賢嘅辣薑,當然包括同年嘅古明華(其實朱慧敏都可能係有獎以嚟最強,不過我無乜睇《金枝慾孽》嘅鄧萃雯,唔評論)。

再講啱啱嘅舊年,《律政強人》係一套TVB罕有嘅十年難得一遇級大製作,其實係緊次於神劇級,要橫掃頒獎典禮其實係唔難,唔止應該攞最佳劇集咁簡單,仲要攞唔到。相反,《城寨英雄》就完全overrated。陳展鵬係咪做得好過《潮流教主》嘅陳豪、《幕後玩家》嘅黃宗澤、《EU超時空任務》嘅王浩信就見仁見智,但你話佢好得過《律政強人》嘅方中信就真係笑話嚟。當然,更明顯嘅笑話係男配角啦。因為要捧Ali場,所以我逼住睇咗《巨輪II》。好明顯,吳岱融嘅鷲哥係超哂班,喺無張國強嘅情況下佢係無可能攞唔到最佳男配角嘅,結果竟然輸俾曹永廉…

睇完咁精彩嘅往績係咪難以想像點樣仲可以破下限?就係同《律政強人》水準極接近嘅《踩過界》,喺星和無線頒獎典禮橫掃咁多獎項其實好合理,尤其係我之前寫過嘅Ali,其實佢釋演嘅王勵凡Never Wong角色複雜難演,Ali發揮得極出色,唔止對佢自己嚟講係一大突破,而且已經好過唔少之早十屆嘅最佳女主角得主,但竟然喺萬千星輝頒獎典禮係20名都無份?再望下張名單,恐怕有過半數人自己拍完套劇都唔知自己係女主角,我更加唔明點樣可以一套劇有四個角色爭女主角。反而Ali自己打自己有兩個角色入圍會合理好多(雖然我都唔知《誇世代》佢算女主角)…順口提一句,《不懂撒嬌的女人》嘅王浩信同樣唔比《踩過界》嘅佢差,我唔知點解會同樣無得入圍,佢今年的確可以兩個角色入哂最後五強自己同自己爭。配角我就唔數落去喇,見到張名單都廢事俾反應…

其實無線到底仲識唔識拍劇?我都唔要求佢拍到日劇咁一套劇得10集11集,一套劇得一個主角,一係男主角一係女主角喇,你合理番少少,清清楚楚每邊主、配角得2、3個得唔得?即係一係第二女主角,一係第二女配角,甚至有第二女主角就可以無主要女配角得唔得?你痴線到一套劇有四個入圍女主角,另一套四個入圍男配角,一套三個男主角一套三個女配角,唔講以為你勁到一年開咗三五七套二百集長劇喎。喂,根據呢個標準套番落神劇《天與地》度,金燕玲、陳芷菁、簡慕華都要入埋女配角圍啦下話?男配角又要加埋劉丹、陳鴻烈、黃智賢入圍?咁講番轉頭點解《踩過界》羅樂林、林韋辰又無入圍男配角?係演得差過《降魔的》嘅何遠東、胡鴻鈞,《使徒行者2》嘅謝東閔?定係戲份少過何遠東或者《使徒行者2》嘅黃德斌?講真,如果爭男、女配角戲份係唔緊要嘅話,咁何遠東又真係好唔過黃德斌、羅樂林喎。

其實我講到咁長氣,主要都係唔滿意攞完最佳女主角嘅Ali王勵凡一角連入圍都無啫。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments