解讀前大律師的中文言論

真係估唔到,經過梁振英呢種對高手嚟講未入流嘅「語言偽術」五年調教,今時今日仲有香港人中文差到連前大律師嘅中文都睇唔明,咁唯有由我呢個慣用英文多過中文嘅人嚟解讀下前大律師嘅言論啦。由於原文組織得比較差,唯有跟原文嘅次序嚟討論:

唔知係咪細個睇得多政府宣傳片「要講俾信任嘅人聽」,我唔知前大律師「信網民」呢個講法邊度嚟,上網講點解就等如「信網民」,更加睇唔明「信網民多過自己」喺邊度嚟?佢係咪覺得呂小姐無講俾自己聽所以係唔信自己?

其實中學中文老師會教,組織能力係好緊要,喺寫作嘅時候佔分好重,墳總無幾耐之前先講過。其實呂小姐篇文叫有組織,唔係叫有舖排。可能林生中學就過英國讀書,中文差少少。

林先生先指責呂小姐唔相信警方,唔相信法律,再提及自己跟清洪時為一個被控性侵犯嘅教師辯護,佢至今仍然相信被告清白,但佢罪成入獄。咁代表咩?其實佢自己都唔信法律,香港有冤獄,但要求人信。仲順便講俾大家聽,堂堂刑事四大名狀之一嘅清洪竟然連一個佢認為無辜嘅人都幫唔到,收咁貴律師費都打唔甩單誣告。

跟手佢先話「無辜嘅就俾你哋屈一世變態㗎喇喎」,再話「個女呢?我當然相信佢唔會貿然講大話,都冇謂,10幾年前仲可以有咩證據?假如當年佢仲係無知同驚到咁。」比較天真嘅朋友可能以為佢係自相矛盾,又撐嫌疑人又好似信受害人無講大話,其實佢係用緊低級語言偽術:唔會「貿然講大話」,唔係唔會「講大話」;無證據理論上係控方應該擔心嘅,亦係受害人考慮唔報警嘅原因之一,不過喺呢度嘅「舖排」係意指嫌疑人都無證據證明自己無辜,呢句嘅用意可以由最尾一句證明。「假如當年佢仲係無知同驚到咁」,意思即係佢認為一個14、5歲嘅少女被人性侵犯會驚同唔識反應係不合常理嘅。咁當然,常識話俾我哋知,一個14、5歲少女會驚同唔識俾反應,合理過一個前大律師中文差、組織能力低、無證據下惡意指控受性侵犯嘅女受害人合理得多。

「世界係唔公平嘅」我唔清楚係指呂麗瑤有咁嘅運動成績而佢自己無係唔公平,定係美國有人將victim變survivor令世界唔公平,又或者呂麗瑤講嘢有咁多人聽佢自己無所以世界唔公平,定係呂麗瑤有被性侵犯而佢自己無所以唔公平。呢句嘅意思青永屍未必識解,可能清洪識解。

之後一段,佢認為企受害人嘅一邊係唔合理嘅,只係人云亦云,搵位泊,識企一定企疑兇果邊。咁又係嘅,跟得刑事名狀,梗係企疑兇果邊啦,如果唔係就入律政署做檢控官啦。最緊要咩?邊個有錢企邊一邊,清洪有錢啲定律政署班高層有錢啲吖?其實,邊個企邊一邊信邊一個,關人鬼事咩。

最後個同前文無咩因果關係,無證據或邏輯推論所達至嘅結論「呂小姐嘅聲明係商業文案,為做運動界KOL,跟風誣告前教練性侵犯」真係完全反映出佢嘅人格。雖然係無證據嘅惡意指控,不過我相信呂小姐都無錢告佢誹謗嘅。民事訴訟呢啲燒錢嘢,唔係個個都有個有錢阿媽撐可以慢慢玩嘅…

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments