盤點最惡頂阿姐2017

cc photo by flickr user Andrea

2017年快將完結,打工仔喺呢一年是悲是喜?呢年比人放左幾多次蕉皮?食左幾多隻死貓?不過,仲有兩個月就出雙糧同bonus,大家振作!!沉住氣!阿姐阿哥阿老闆有幾難頂都頂住啦,唔好同錢作對~
2017 係矛盾又掙扎的一年,皆因我跟住個令人血壓上升嘅阿姐~ 諗過無數次裸辭保命,但好彩公司都有班志同道合嘅小薯開解下同互相支持下,所以我一於同阿姐鬥長命,睇佢走先定我頂佢唔順走先~ 呢個2017年,我每一日都活在忍耐中!既然仲未可以裸辭,我唯有將我阿姐嘅惡行訴諸文字,寫左當鬧柒左佢!!

惡行不分排名:
1. 工作能力低,用是非當人情保住自己地位 – 每間公司實有呢類人,而實有啲昏君愛呢類廢柴。阿姐佢自己廢唔緊要,但間公司仲有人跟佢搵食,比條生路行下。「你的阿姐如何,你的仕途必將如何」……

2. 無記性,個腦長期唔夠ram – 唔係歧視生產完嘅婦女,亦都唔覺得生完會無記性 (其他同事生完BB復工都狀態大勇,所以係人嘅問題吧) 但我個阿姐生前生後個腦長期處於唔夠 ram 狀態;每件要同佢講兩次,因為佢個腦load 唔切…… 姐呀!我好累呀個口~

3. 理解能力差,語文能力更差 – 一件普通嘅事去到佢手上會變到好複雜, 皆因佢永遠理解錯件事,作出最錯決定。而語文能力差曾經喺公司鬧出不少笑料,佢嘅一句: “can you press down the target? we can not earn money” 簡直世界級!令各同事對佢的學歷非常好奇

4. 自己唔OT,唔準同事OT – 呢樣野最賤,佢日日準時走,我晚晚OT,咁樣會顯得佢唔夠勤力喎,唔多唔少有啲影響印象分,所以…不下數次同我講唔好OT!!Well ~~~ 你估我憎公司憎到每日OT 浪費佢燈油火蠟咩??

5. 扮做野嘅人最可恥 – 阿姐日日傾電話,有時真係懷疑點解有咁多「工作」嘢傾?而自從佢生左BB後,日日係公司暗暗地訂奶粉同有機蔬菜。有一日,如常打電話扮傾「工事」,但對方電話接收唔好吧,佢係個位度大大聲講:我唔要節瓜改南瓜!囧囧囧

6. 怕事 – 簡單易明,不解釋!以和為貴type C9。但職場如戰場,你怕事等於自己開左城門叫D賊入黎又搶又殺~佢不如番歸湊仔啦

簡單地分享6個點先,更精彩嘅陸續有來。我對住呢個女人已經到左極限……鬧過、吵過、而家歸於平靜,以一招以退為進 「保命」
歡迎交流你嘅阿姐名哥有幾惡頂?come on baby~~

文章已於我facebook分享過

seven@s.com'

工作柒常

任職某地產霸權旗下分公司,負責大中華區柒務多年,高級小薯一名。曾經天真覺得做好自己份工已經夠升職加人工,現實是職場太多潛規則… 太多膠人膠事令你不能自我。每日過住番10放7的小日子,睇住公司班女人勾心鬥角仲精彩過央視春晚。工作中最享受莫過於用”公帑”出差應酬暫時離開一下動物園。

More Posts

Follow Me:
Facebook

高人指點

comments