Justice League,又真係幾爛

其實我本身係對美國英雄片無咩興趣嘅,第一次入場睇就係睇《Wonder Woman》,所以見到Gal Gadot係無可能唔入戲院捧場嘅。咁當然,我對大部分角色嘅實力係無咩認識㗎啦…咁個爛位喺邊?咪就係除咗Wonder Woman同Superman,其實成個Justice League係廢㗎囉…

(以下嚴重劇透,如果算係有劇情的話)

首先,負責call馬嘅Batman…其實佢係普通人嚟嘅,正如佢自己所講,佢嘅超能力係Super Rich。撇除科技之後,你會發覺佢連單挑一隻parademon都難,而parademon一隻其實係弱過一個amazon女戰士嘅,好似係…好喇,咁有錢玩科技係咪佢嘅存在價值呢?唔好意思,唔係,因為有Cyborg。雖然Cyborg本身有少少似Iron Man加電腦病毒,但其實都唔係好打得,不過,佢用Batman 啲架撐用得好過佢,亦即係話Batman嘅用處變咗提供工具俾Cyborg,名乎其實嘅工具人。咁當然,Cyborg除咗做司機兼機師,Cyborg都有用嘅,咩用就自己睇啦,不過唔係打囉。但起碼,佢都夠單挑parademon…跟住到Flash,佢自己都講到明,其實佢無打過交。佢係跑得好快,不過成日PK,格鬥能力同樣係零,唯一用途係…叉電。

好喇,講完三個其實唔打得嘅角色,就到一個好似打得嘅角色,Aquaman喇。呢位其實係幾神奇,佢好似打得,又好似唔打得。人如其名,佢其實喺水底嘅戰鬥力應該遠高於陸上,但佢喺海底嘅Atlantis唔夠敵方大佬Steppenwolf打,但最後一場喺陸上又可以同Steppenwolf相差無幾,戰力直逼Wonder Woman。咁當然,睇番佢對陣parademons嘅時候,又好似只係可以一個抽2、3隻,又唔係好勁。而喺Superman復活前係得佢同Wonder Woman識打。不過,Superman復活之後佢就變咗無乜用…

講完四個,係咪以為數完呢?又唔係喎。就係Steppenwolf喇…嗱,首先佢係應該超勁嘅:咁的確五千年前佢係同班parademons大戰地球全部勢力,係被圍毆最後被眾神驅逐嘅。咁當然,睇過Wonder Woman嘅都知佢本身就勁過打贏宙斯嘅戰神,所以同Steppenwolf打成平手係正常嘅(雖然第一場似略輸半籌,但分唔出勝負)。由於其他人太廢,所以加埋一齊都無幫到Wonder Woman打贏Steppenwolf,直至最後一場開始走樣喇:本身呢,係應該得Wonder Woman同Superman同佢同級,亦即係單挑分別都贏唔到佢,唔知點解應該弱佢最少一級嘅Aquaman都可以同佢過招不分勝負啦,最後係由Superman將Steppenwolf個斧頭變冰,之後Wonder Woman斬碎佢把斧頭,跟住佢就突然淆底被自己班parademon圍,著草返歸喇。劇情並無交代佢把斧頭係佢力量來源,原來一碎咗就會廢到連自己班𡃁都打唔贏,當然都無講點解佢仲可以著草,唔係當場被自己班𡃁分屍啦…

好喇,咁至於套戲值唔值得睇?值,俾幾十蚊睇Gal Gadot點會唔值?不過片尾彩蛋真係唔睇都罷,無為浪費時間。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments