其實你從未放低過舊愛人

cc photo by flickr user Eyesplash – Summer was a blast, for 6 million view

中秋節,馬路同街燈終於決定起埋一齊。因為街燈已經受唔住,日日夜夜見住啲情侶咁sweet咁挨住燈柱攬住哂。佢覺得寂寞了。馬路覺得,拍下拖都唔錯,平時剩係俾啲車係咁車過,生活太枯燥,加啲色彩why not?

從此之後,兩個就甜甜蜜蜜。日頭,街燈訓緊覺,馬路都會細聲啲廢事嘈醒佢。夜晚,街燈醒左,街道又無咩人車,好岩兩個談情說愛。

馬路從來都未諗過一支公既生活都可以咁幸福咁豐富,可以聽到視野廣闊既街燈講佢睇到既野,例如邊幢樓天台有個學生危坐,邊個樓層既同居密友大左肚,看更係後巷打貓貓。佢以為自己咁長,已經睇到好多好多野,但原來都係幾狹窄。

「我真係好愛你,唔知我地可唔可以永遠一齊。」街燈都係好快樂。佢係馬路身上學到好多野,睇到佢個人幾咁胸襟廣闊,亦都睇到佢默默為城市既貢獻。況且,自己雖然生得高望得遠,但始終過唔過啲大樓,望極都望唔到天台。而馬路呢就可以成日睇到轉個彎之後既野,更神奇既係,馬路好有智慧,因為車個影都未到,佢已經預知到黎緊,聽力又好勁,好似聽到哂附近啲人講既野。 「我地當然可以永遠一齊啦 😍」
日頭,有時有啲呀婆推住架爛車,挨住燈燈抖下。有時有啲路人,停左係度吸煙。下晝就好多人黎附近搭車。夜晚後巷啲貓一家大細黎挨住燈燈,訓係路路側邊。大家好享受呢啲安謐既日子。

光陰似箭,日月如梭……一横一直,依然都係咁sweet到漏。轉下眼,咁快就到左光棍節。

一覺訓醒,馬路揾唔到街燈。街燈原本既位置已經空左,地上面多左一個窿。附近企左平時成日踢貓果個看更,隔離係幾個著制服既男人。 「… … 琴晚都仲係度,我都唔知點解今朝就唔見左。」
「記唔記得最後一次見佢係大約幾點?又係幾點發現佢唔見左?」
「琴晚凌晨1點,我出黎食煙,仲見到佢。今日朝早6點,我行出黎就唔見左佢喇。唉。都唔知點解 … 呀sir呀 … …」
「好,我地會查下,有咩事再聯絡你,唔洗擔心。」忽然一個制服男人電話響起。佢一聽,傾左幾句:「ok, ok, 過海,而家去德輔道西」,就收線,係其他人耳邊講左幾句。大家就走向一架車開車booboo走左。看更望住佢地開走左架車,然後掉左個煙頭落個地上面個窿,轉身邊行邊講。「半夜走左,都唔知係咪俾人拐走。唉,咩世界!」馬路望上去,平時仲係見到街燈望返落黎。

今日,風景唔同左。佢覺得好想喊,好痛,好掛住街燈,好想知街燈發生左咩事。以後都唔會有人夜晚同佢傾計,以後都無人同佢講天台既學生點。但諗諗下,其實佢自己都知。街燈以前唔係呢道,佢以前係海既另一邊,德輔道西,生活左好耐,後尾唔知點樣發展社區,先過左黎。佢從來都唔講佢以前既生活,大概一直有野隱瞞吧,而馬路都不想去問。近幾日街燈望住海既方向,都會露出唔知咩意思既神情。作為馬路,佢點會感覺唔到呢幾日街燈隔離既土壤愈黎愈鬆,街燈唔多講野,甚至仲話同佢其實唔太夾。佢曾以為自己既愛可以令燈燈忘記過去,永遠留係呢道。

Nathan好傷心,佢諗,到底點解街燈要離開佢呢?到底點解唔坦白呢?到底以前既快樂對街燈黎講算係啲咩呢?就只係深夜既慰藉嗎?唔夾姐係點呢?點解一個曾經對自己好既人可以咁傷害自己呢?

對面海係點既呢?其實,德輔道西係點既呢?佢係咪好長好好闊?佢係唔係好有歷史?佢好勁?

於是,彌敦道好努力好努力去延伸,但係始終過唔到海。或者有一日終於填完維港,佢就可以重逢S736X燈燈。佢要問佢,有無愛過?

高人指點

comments