做男人應該學張繼聰

我知睇完個標題一定好多人答我「邊個唔想吖」:有靚老婆、有事業、有仔女,人生贏家佢一定係其中一員,單單係四千呎比華利山已經可以令人高潮幾廿次。

但唔好唔記得佢曾經比人笑佢應該跟老婆姓謝,笑佢淨係識靠老婆,難聽啲講即係「冇撚用」。

十個男人九個要面,比人話食軟飯唔多唔少都會覺得難受。一嚟好似自己靠女人先生存到咁,二嚟自己結咗婚唔可以親手比到老婆幸福,比著我會好想煎巴自己。有啲男人為咗「彰顯」自己地位,會對住老婆發爛渣甚至郁手——愈係覺得自己比人睇唔起,愈要搵地方去表現霸氣,結果愈搞愈衰。但張繼聰受嘅閒言閒語就算比普通人高千百倍都好,只要睇佢早兩日講嘅嘢就知佢依然放老婆感受係第一位。自己比人笑唔緊要,佢依然出嚟為老婆支持打氣。

認低威對男人嚟講真係好難,證明佢真係好愛謝安琪。

好啦,比人笑足幾年,終於靠無線上位,由拍節目劇集到而家代言電影都撈埋,謝安琪都開始收山等老公養,證明張繼聰終於搵到足以令一家人好好生活嘅收入。張繼聰冇一朝得志,冇對住老婆也文也武,繼續做佢嘅廿四孝老公並以自己老婆為榮,亦都會喺網上反擊針對謝安琪嘅網民,仍然視佢做掌上明珠一樣。兩公婆經歷咁多風風雨雨都恩愛如初又接近零緋聞,羨慕死人。

有咩開心得過有一個男人以令自己過得更好為目標,而最後又將依個承諾做得咁完美?

當然唔係個個都有機會發圍到搵嘅錢多到你租間四千呎大屋,但張繼聰對謝安琪嘅心態絕對係身為男人應該有嘅。唔一定大富大貴,但起碼唔洗餐搵餐食餐餐清。對女人嚟講安全感唔洗好多,但一定要有。望住而家嘅張繼聰,你會明白咩叫苦盡甘來。

「所以你話,人生幾美好,根本就冇衰嘢」依句由佢口中講出嚟特別有說服力。當然啦,張繼聰有今時今日,謝安琪都功不可沒。做男人應該要學張繼聰;而做女人最好就要學下謝安琪。

即係點?比啲時間你身邊嗰個,唔好想佢一夜成功囉。

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments