自殺與精神病

呢個題目其實應該早幾個月寫,畢竟我記性麻麻,六、七月因工作需要睇過嘅研究真係好難記得太多。簡單講,同普通人可能有理解唔同,自殺者九成係受精神病影響而自殺,其中比較常見嘅係抑鬱症、躁鬱症、焦慮症。所以,大家真係要明白一個基本概念,唔好話自殺者係不負責任、無勇氣,以為同特定事件有關,佢哋唔想㗎。

眾所周知,老海鮮最鍾意話幾十年前生活點艱苦,但無咁多人自殺,宜家啲後生仔唔捱得乜乜乜。事實上,唔同專家嘅研究分別研究過精神病喺近二、三十年不斷上升嘅原因,例如:University of Arizona嘅精神科副教授Charles Raison指出精神病嘅成因可以係身體問題、家庭、社會,甚至環境問題,例如二手煙、smog都會導致抑鬱症、企圖自殺數目上升。另外,University of Kansas 臨床心理學副教授亦指出,現代人嘅生活模式亦同抑鬱症急增有關,例如缺乏優質睡眠、社交活動、陽光、運動之類。

當然,更複雜嘅社會環境、人際關係亦會導致抑鬱,除咗辦公室之內,仲有網絡,娛樂圈亦不能幸免。以香港為例,除咗張國榮,其實張繼聰、謝安琪夫婦都分別患過抑鬱症,而陳奕迅亦曾患上躁鬱症。而喺英國同美國,同樣有唔少演員患有抑鬱症,特別係喜劇演員,例如Jim Carrey、Robin Williams、Rowan Atkinson (Mr. Bean) 同Stephen Fry。

演員,毫無疑問特別容易受網絡欺凌影響。而除咗演員,年輕人亦容易受網絡欺凌影響,好似Paris Jackson就係比較經典嘅例子。學生自殺,以香港同其他東亞國家為例,學業壓力係一大原因,開學前後更加係日本同香港嘅學生自殺高峰期。其實香港電台喺呢方面一直有報導相關問題,鏗鏘集亦講到喺80年代香港家長(即係5、60後)已經會令小學生有好大壓力,令佢哋容易有情緒病。學生自殺,嚟自家長、學校嘅壓力係一大原因。校園欺凌、對未來感到絕望亦係原因之一。前者雖然喺香港唔算罕見,不過由於香港並唔似歐美甚至日本人口較少嘅小鎮,學生會困獸鬥,所以校園欺凌並唔係學生自殺主要原因;後者我諗唔洗我講,香港本身有幾令人絕望大家都知,再加上家長、教師同學生講讀唔成書搵唔到工乜乜乜,明顯係一大原因。至於網絡欺凌喺香港有無導致學生自殺,暫時應該無人做過研究。由於青少年腦部發育未完成,係會對外在環境、壓力比較敏感,所以令青少年有壓力嘅家長、教師的確難以推卸責任,而負責教育制度嘅政府更加責無旁貸。

略為總結一下,學生自殺比幾十年前多,係因為學業壓力比以前重;精神病個案比幾十年前多,工作壓力大、工時長、人際關係更複雜、空氣污染都係原因,當然,仲有對精神病嘅認知略為普及化,求助個案上升有關。

不過,香港嘅自殺率其實同歐美國家相比並唔算高,Happiness Research Institute 嘅CEO Meik Wiking嘅研究就可以解釋到:佢指出一個國家、城市嘅快樂指數同自殺率其實係成反比嘅。例如丹麥自殺率高企,而喺美國夏威夷嘅自殺率亦比紐約高。個理論好簡單:大家都慘,你唔會覺得自己慘,就好似如果失業率50%,你失業好正常,但失業率得2%,你失業就好大壓力一樣。香港點解自殺率低?因為快樂指數夠低嘛…

最後,用我聽過最特別嘅兩種治癒抑鬱症方法做總結:1. K仔。我聽嘅係Forrest General Hospital嘅Chief Medical Officer Dr. Joe Campbell 講嘅Ketamine有效減低嚴重抑鬱症患者嘅自殺傾向。2. 上文提過嘅精神科副教授提出嘅高溫治療。

當然,有問題最緊要向專業人士求助。雖然香港公立醫院嘅精神科醫生數量好少,要輪到都幾難,不過臨床心理學家都可以幫到手,仲有,家人、朋友嘅陪伴都好重要,自殺真係可以預防嘅。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments