對於跨區扮工人士黎講,坐巴士放工係幾舒服既

cc photo by flickr user Phillip Capper

對於跨區扮工人士黎講,坐巴士放工係幾舒服既。不過成句野有兩個前設……前設一:坐。如果冇得坐既,咁唔洗講,係咁先。痴線返足成日工騰黎騰去,仲要玩罰企,咪搞。前設二:放工。我從來都唔會搭巴士返工,驚塞。遲到當然係問題,但我最唔鍾意巴士一塞果時就挫下挫下咁,個人會好想嘔。但放工唔同,感覺冇咁塞(雖然最癲其實係試過塞車塞到用左三個鐘先返到屋企……不過都係試過一次……都夠皮架啦),同埋唔洗驚遲到。嗯……只要有得坐,一個鐘鬆d既路程,巴士其實係幾舒服。好啦就算俾地鐵做到同一效果(係啊好叻豬啊俾你坐到非關愛座),時間又差唔多,我都唔會揀坐地鐵。點解?原因就多囉……

第一,巴士真係靜好多!都唔知由幾時開始,火車又好地鐵又好,d人都好似特別鍾意大聲d講野。唔係唔俾你講,但係真係唔洗大聲到全車人都聽到你講野架……你個朋友都係係你隔離啫,有必要覺得你係地球佢係火星咩…?搭地鐵都還好,一上火車真係呢……又多篋又嘈,攰左成日想訓陣都唔得……呢,但係巴士就唔同啦。你好明顯見到,放工時間搭得巴士既,通常都係自己一個(真係好少三五知己一齊搭,最多都係兩個人)。咁自己一個,黎黎去去都係得幾樣野做:訓教、聽歌、望街、玩手機。當然都會有人傾電話,但唔知係咪因為本身架巴士靜,d人都唔係幾好意思大大聲講野,個個都盡量細聲d(不過總有老鼠屎,我見過…我真係見過…)。能夠舒舒服服有位坐,可以恰兩恰,靜靜地聽下歌、望下街,可以自己一個靜靜地休息下(就算做咩都好),真係好舒服。

第二,空間感夠。巴士,應該冇人會一個位坐兩個人(坐大脾呢d就唔計啦xd),我坐火車就成日見到四人座坐五個人(真係辛苦哂所有東鐵沿線既朋友們……)。兩個細佬仔當一個大人咁坐,我都覺得「算啦,小朋友咋」,然後自己坐得逼少少就算。但係兩個大人坐一個位??咩人會咁坐?請自行判斷。大佬四個人坐其實都係岩岩好,我睇唔到邊到可以多個位坐多一個人。丫,又好野喎,又真係俾佢地坐到。坐已經唔夠坐,何況企?唔知呢,我成日覺得遊客真係唔乜搭巴士。你幾時見到外國人會搭巴士?將心比己,我自己作為一個遊客,我都係比較鍾意搭地鐵,好似有安全感d,而且唔係到到既巴士都有提示話下一個站係咩。咁所以,都唔難理解點解火車同地鐵特別多遊客。巴士,係空間感呢方面真係技高一籌。至少,冇咩篋先。

第三,唔洗俾咁多人望住。如果你係果種訓教果時,個睡相係擘大口流哂口水既人(即係我,太投入~),少少失禮點都覺得會有掛。巴士既好處就係,除左坐下層會有人睇到你訓教個樣(就算唔係面對面既位,企係走廊既人一樣望到你),上層所有位都係望住車頭。坐上層,除非你個頭挨埋去側邊果個人個膊頭到啦,如果唔係,我諗都冇咩邊個會特登另轉面望下你訓教個樣既。至於地鐵啦喎,只要架車多人少少,又有人企係你前面,你訓教個樣就點都會俾人睇到(嗯…又或者你可以耷低頭訓既,咁就乜事都冇)。就算冇人企係你前面,地鐵既設計就係一排對住一排,坐你對面果個都會睇到你流口水個污糟喵樣(嗚嗚我唔敢係地鐵訓教就係咁解)。至於火車好似會好少少,因為每一卡都仲有八個位係可以唔洗望住人(係啊,兩人坐果隻)。其實返左成日工,個人真係會好攰,如果可以恰下我都會訓下教,所以有一個較為安心既教教豬環境(唔好拎屋企黎比),唔洗俾人望住哂真係算唔錯架啦!拿,所以呢,私隱度呢方面,巴士又完勝。

仲有啊,地鐵成日跪低,又貴,仲要成日加價。望返巴士,好多時都係平過地鐵少少,可能差一蚊幾毫,雖然唔多但都係錢丫。係,巴士最近多左交通意外,不過意外既野就算你唔搭巴士都可能會遇上。至於時間方面,地鐵係某d路線上確實係會比巴士快。只係,我個前設係「放工」時間。都放左工啦,唔想再乜都chur盡(返工仲chur唔夠咩…),如果唔係趕時間既,我都係鍾意搭巴士。

高人指點

comments