仲有冇人記得Facebook入面既Pet society?

究竟係我懷舊丫,定係人老左呢?嗯……或者兩樣都係?

大半年冇入過Facebook,唔想入,黎黎去去都係睇到d人「好開心」周圍曬美食曬旅行相曬男女友,幾多係扮開心幾多係真開心,我唔識分,亦懶得去分。煩。Facebook仲未正式攻陷香港之前,好似都仲係MSN同Xanga既年代。果時就算申請左Facebook,都唔多用,始終唔鍾意試新野。到後來,MSN同Xanga都宣佈摺埋既時候,真係覺得好唏噓。今次真係唔用Facebook都唔得了~一用,就用左咁多年。所以話,人好多時都係唔殺到埋身都唔會肯去轉。

有一排Facebook出左好多好多遊戲,由一開始既「義氣仔女」(仲有幾多人記得呢隻game??),到後期少少既「Pet Society」同「Restaurant City」,仲有種農場啊養魚啊乜乜乜,我係真心著左迷。唔知點解鍾意玩架喎,但係又真係每日放學就渣渣臨返屋企,換好衫就即刻開電腦,睇下自己d魚死未(係啊唔餵佢佢會反肚,有d魚仲要淨係食高級糧。做魚好過做人?),又會睇下d士多啤梨種好未,又會睇下今日隻pet pet有冇唔開心(要去pat佢同佢沖涼同佢玩)。Umm…我零舍鍾意玩pet soc,因為可以同隻pet pet扮靚靚,帶佢參加跑步比賽,同佢玩下frisbee呢d互動遊戲,釣魚等等。雖然而家諗返覺得有d變態,但真係好玩,又過癮。一玩就會玩足成晚,真心痴線。但,最痴線既係,我仲會走埋去d forum同人交換道具或者禮物(係啊,果時好興玩論壇,乜乜3男2女啊uwants啊等等。而家?Facebook咪係全世界最大既論壇囉…)除左遊戲,仲有好多占卜星相命理心理測驗等等既應用程式,當然都唔會錯過(erm…最鍾意就係睇下自己同暗戀果個人既星座係咪命中注定xd)。總之當時真係好似走火入魔咁,一日起碼用四個鐘去玩哂所有既遊戲(係啊,係所有,玩少個都周身唔聚財),你話係咪變態?

嘩講到呢到已經打左個凸,估唔到X年前既自己係咁低B,但,無可否認既係,果時真係好開心。

嗯……唔記得由幾時開始,開始玩少左facebook game,之後仲唔知點解無啦啦冇得玩!你可能話我膠啦,但係,我真係好想好想玩返呢d game……尤其係而家咁需要快樂既我。

到近呢一兩年,Facebook多左個新對手Snapchat。眼見愈黎愈多人用Snapchat,Facebook當然唔甘心,又走去抄人個story function(好似係放左係ig到?唔太清楚,我連ig都唔update,up完又要重新適應,好煩)。唔理啦,我想講既係,咁「懷舊」既我,都係冇download過Snapchat(都唔知應該話自己老餅定係文塞)。朋友成日問,點解你唔download Snapchat啊?點解你部手機冇Snow架?點解你唔玩狗仔相啊?我都係答「係啊,冇啊」咁就算,都唔知點答!唔通同人地講「我係咁old school咁死牛一邊頸架啦!到Facebook執笠果日我咪用Snapchat囉」?

嗯……其實我到而家仲係好掛住MSN、Xanga、Pet society、種農場、玩論壇等等。正確d講,應該係掛住同我MSN既人、係我Xanga留言既人、同埋玩遊戲玩得好開心既自己。不過,都返唔到轉頭了。你呢?你又記唔記得呢d遊戲?唔知會唔會係到搵到知音呢?記得既,不妨留個言丫,或者我會重新用返Facebook黎回應下:)

高人指點

comments