冇公平既感情,冇

cc photo by flickr user ♥ valeina & me

一早都知世界冇公平既感情呢回事,只係,接唔接受到又係另一回事。

細個屋企人淨係識偏住呀哥家姐;讀書老師又淨係偏住d高材生;出黎做野老細又淨係偏主任經理級。以為揀朋友或者伴侶方面,大家可以平等少少啦掛,都唔係,一樣係唔公平。我對你再好都好,都唔代表你會同我做朋友,更加唔代表你會做我另一伴。或者你會問,同一個呀媽生,同一間學校,又同一個老細,點解會有待遇差異。以為係自己唔夠好唔夠乖啦,其實都唔係丫。我都係屬於中上,唔係太資優,但都唔係蠢鈍愚,又從來唔搞事。嗯……冇架,純粹睇你唔順眼囉,唔鍾意你囉,係咁唔公平架啦,你有本事咪做老細,去揀下屬偏囉。

有一次同朋友傾開計,先發覺原來「唔公平」背後,除左可以係無緣無故憎死你之外,都仲可以係有一d理由既……

「你話啦,我對佢咁好!佢得左果陣,我戥佢開心。佢難過果陣,我又會係佢側邊陪住佢。就算佢唔記得我生日,我都可以當冇事發生咁同佢慶祝佢生日。但係,點解喎,點解我覺得佢對其他普通朋友仲好過對我?」
「你有冇聽過一個關於糖果既故事?」
「冇。」
「我有兩個朋友,甲同乙。甲有五粒糖果,佢對我好好,分左三粒糖俾我。我好感謝佢。後來,我買左十粒糖,送左四粒俾甲,另外六粒俾左乙。甲知道左好不滿,覺得我偏心,對乙好過對佢。但係,甲從來唔知道既係,曾經乙手上只有三粒糖,而佢就將三粒都俾哂我。」

五分鐘裡面,大家都冇出過一粒聲。沉默既氣氛入面帶點尷尬,又帶點羞愧。呢個時候,朋友選擇打破沉默。

「其實,世界又有咩野可以做到絕對公平。我同我細佬一人一碗麵,呀媽俾左四粒龍蝦丸佢,俾左三粒牛丸我。你一定覺得好唔公平啦,細佬有四粒喎,我得三粒,唔公平!但其實我唔食龍蝦丸,而我細佬就唔食牛丸,咁樣既分配對我黎講係好到不得了。有時候,唔係要兩個人得到一模一樣既野先叫公平,當中仲有好多要衡量既因素。」
「嗯,我明你講咩。就好似……就好似你送左一朵花俾我,我唔一定要再送一朵花俾你先叫大家有來有往。我送返一條朱義盛頸鍊俾你,其實都代表左一種心意。你會覺得花好新鮮,但可能對我黎講頸鍊夠長久,起碼唔會凋謝。」
「冇錯。」

用「公平」去量度感情,本身就已經唔公平。因為感情係一樣好個人既野,每個人心目中既秤都唔同,點量?拿,講就係咁講,做唔做到又係另一回事。(鍾意一個人果時,你估咁易可以睇得開咩。到時咪又係死chur爛chur話點解我對佢咁好都要同我分手/點解唔鍾意我)大家一齊學習啦,長路漫漫啊~

高人指點

comments