有條香港柒頭話日本人飲食唔健康

cc photo by flickr user minato

話說今朝喺網友砂糖度見到有篇報導講,有個教書嘅蛋散移民日本,覺得日本人飲食太唔健康,所以開間粥舖等人食下粥健康下喎…其實相信唔少人都有啲教書嘅朋友,都有可能見識過長年累月對住班後生仔有佢講無人講嘅教師,好容易以為自己掌握真理,仲會將自己僅有嘅有限專業知識無限擴展出去其他範疇,指點江山。好明顯,事主唔係教中文嘅,無聽過「人之患,在好為人師」。呢一句嘅歷史就肯定長過廣東粥喇~

其實日本人飲食有幾健康,真係求其睇下人哋嘅小學、大學同醫院分別有咩嘢食提供,再同香港對比下就知。日本人任何時候都飲冰水嘅習慣就唔係好長嘅啫,得幾十年歷史。咁啱日本人係全世界最長壽嘅人都係近兩年先被香港人追過,如果所謂飲凍水、食生冷嘢唔健康,咁照計同樣「有五千年歷史」嘅中醫幫助下,中國人應該一直都係平均壽命「領先全球」一截。唔好賴窮喎,我哋喺報紙見到嘅日本人瑞全部經歷過廿世紀初一戰前直至五十年代嘅貧窮年代,日本人經濟起飛都只係六十年代開始果廿幾三十年,好明顯唔關事,而且有中西名醫調教…調理嘅毛澤東、鄧小平,都只係同日本嘅平均年齡差唔多,未夠班同人瑞比。所以呢,「五千年歷史」、「凍飲、生冷嘢唔健康」呢啲笑話,留番當故仔講俾幼稚園學生聽好喇。

講開歷史,日中文化交流,遠至1500年前嘅遣隋使、遣唐使,近至二戰前嘅駐華代表,仲可以接濟埋國父孫文,點解無引入養生聖品廣東粥呢?咁可能要搵飲食歷史專家黃邪兄研究下讀醫嘅國父有無日日食粥喇…可能國父會答食蘿莉養生啲啦~

再講香港,日本人喺香港都唔止五十年歷史。唔數戰前歷史,淨係計二戰後經濟起飛之後,香港日本人學校、香港大丸百貨咁啱都係1966年成立嘅,咁點解無日本人覺得廣東粥咁養生,要引入日本呢?其實呢,日本人唔係無粥食,係唔覺得有咩特別養生、特別好食啫。求其上網碌下,就會發現八十年代已經有日本作家出書講瘦身美人粥、藥膳粥。當然,我知上網做research唔係個個都識嘅,教師唔識好正常。

另外再順便講下,其實overweight 同 obesity基本上都可以反映到飲食健康嘅,當然唔係淨係飲食健康啦。雖然宜家飲食好健康、又識養生嘅中國人男性overweight比率贏日本10%(38.7%vs28.8%),女性贏日本15%(33.1%vs18.8%);obesity嘅中國男性多日本一倍(7.4%vs3.7%),女性近乎多兩倍(8.2%vs3.0%),不過其實都只係呢個世紀嘅事,喺90年代overweight嘅男性比率係日本高過中國,而80年代連日本女性都高過中國添。咁反映咩?日本人飲食普遍健康過中國人好多,不過都唔係無改善空間嘅:外食族,或者應該話出名工時超長嘅上班族,都的確有唔健康嘅飲食習慣,或者應該話唔健康嘅生活習慣,但無咩可能將呢樣嘢同食生冷嘢、飲凍水拉上關係。

畢竟有常識都知,人體溫度37度左右,就算你將喺雪櫃拎出嚟嘅凍水直接飲落肚,經過口腔、食道,落到你個胃都已經低唔過室溫;食物更加無可能,魚生切完、上碟,你咬完都十幾廿度啦,未落到胃已經係體溫溫度。咁當然,呢個年代常識好罕有嘅,我明白。

吖,講時講,五千年歷史嘅中醫有無話你知,經常食、飲溫度過高嘅嘢,好易致癌?至於粥呢樣嘢,其實以前流行唔係因為以前嘅人相信養生,只係窮,無錢食肉,而煮粥又平過煮飯啫…

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments