不可弒師的華人社會

cc photo by flickr user Don Urban

弒師,係華人社會其中一種最深嘅恐懼。君臣父子,一日為師終身為父。你係我徒弟,你要一世喺我管轄裏面。因為你嘅一切都係我俾你嘅。我未話你滿師,你唔准下山,你嘅一切要得我承認。出咗山,我哋可以做朋友喇但係!你依然要盲目咁尊敬我,唔可以駁我嘴柴我台。
喺我哋成為朋友之前,sorry 我哋唔係平等個體,所謂亦師亦友,只係我個人無架子,要明白永遠師在前,友在後。
咁嘅諗法亦存在喺父母家長中。我不給的,你不能要。你要反我,係你食碗面反碗底。你拜多一個師,係你欺師滅祖。所謂叛徒,一開始就係講「師徒」關係。
教識徒弟無師父。所以為師我永遠留有一手。怕你有日另起爐灶,怕你搶我飯碗。更怕係你唔再尊師重道。
U know who I am? Whoever u become, I am your teacher, and I am always your teacher.
比Star Wars “I am your father”更令人抱柱慘叫一聲”No!!!!!!!!!!!!!!!!!!!!”

每次有中國傳統技藝失傳,我都一半感可惜,一半感可笑同求仁得仁:黃子華式騙老母局 – 母親根本等緊有日夢想成真,子女落難終於需要自己打救;傳統終於喺自己堅持下失傳,我!me! Am the one and only one who knew it。求我啦,我係唯一。尊敬我啦,珍惜我啦。多麼傲嬌。君不見大眾真係覺為師我無價值。或者有其他人都同我一模一樣,甚至更好,但人哋拜師唔駛下跪,互相尊重。咁消失就消失好喇。

講到尾都係玻璃心。青出於藍勝於藍,喺咁嘅系統無幾人能勝於藍、敢勝於藍。勝於藍時,青會俾人再三提醒:你出於藍。唔好唔記得。
是以藍係咁大嘅靠山,會養得起一班廢柴嘅雜色,例如鴨屎綠。因為永遠可以大聲講:你知唔知我師父係邊個?就根本唔需要爭取自己係邊個。
依個不許弒師嘅制度下為師哀嘆無人出類拔萃,君不見汗血寶馬總要有野馬雜交而生。純種係永遠配不出汗血。

當然野馬更多係生野馬,此作另話。

我祝你永遠落後。

whatever@whatever.com'

WHATEVER

你的異常是我的正常

More Posts

高人指點

comments