男人有話兒(13)爛桃花沒完沒了?你是「唔小心收咗兵既女仔」嗎?

cc photo by flickr user Eric Malette

由結論講起,柳臣係唔相信有女仔「唔小心」收咗兵既。
兵同娘娘係一種互動既關係黎,無娘娘就無兵。兵仔想要付出,都總不能無中生有。呢種關係可以由一方做主動,但如果另一方拒絕的話,對方亦都無機可乘。
舉個例,做兵隨傳隨到、比錢埋單、買禮物、攝時間。呢啲行為全部都係要女方比機會,甚至女方主動配合,兵先可以叫做兵。
會唔小心收咗兵既女生,大多都係曾經發放錯誤訊息俾對方,令對方以為有機可乘。
你有冇莫名收過貴重既禮物?你有冇約過對方單獨食飯?你係咪鐘意得閒無事就搵下對方打發時間?
呢啲行為,係「唔小心」既女生心目中可能只是隨意之舉,但係對於本身就對你有意思既男生而言,就已經係發放緊邀請對方既訊號。

女生唔應該用「朋友」兩個字黎做擋箭牌,除非你真係覺得自己係天生麗質,所有男人都應該拜倒在自己石榴裙下。除非你覺得男人對你示好係理所當然既,否則你應該要意識到呢個世界無男人係天生鐘意整電腦、請人食飯、同被你打發時間。
為咗自己好,亦都為咗對方好,好多對方既心意,必須要果斷地拒絕。
甚至有時係唔怕直接同個男仔講到明:「呢啲野我唔可以接受/呢件事我只會同男朋友做。」

或者可以咁講,娘娘收兵,係有心發放「我好易追」既信號;但所謂唔小心既女仔,其實佢地係無意識地不斷向身邊既男士發放「我好易追」既信號。
而後者係比前者更大殺傷力,前者都只係一枝具針對性既狙擊槍,而後者係一顆無差別唔知幾時爆周街走既核彈。
但就結果而言,呢兩種女仔對男仔而言係無分別,因為男仔都只係會接收到「追我啦」呢個信號。

除咗女士應該要察覺到男人既目的之外,另一方面,男仔又要識得係適當既時候講明白俾對方聽。
「嗱!我唔係鐘意整電腦架!見係你炸!同埋我唔係次次整架!如果你當我係工人或者純朋友就算啦。」

雖然男人都係好要臉既生物,又怕瘀怕輸。但有時你唔講到出口,雙方都只會心存僥倖。
女人心存僥倖覺得對方「做到咁未必係鐘意我既,佢對朋友好姐」。
男人心存僥倖覺得對方知道自己「做到咁佢應該知道我鐘意佢啦」。

grace@gracegrace.com'

格蕾絲

生活充滿刺激,性情大喜大悲,但深信平淡平靜才是幸福的源泉。情情愛愛,性性愛愛,還只是生活的一部份。

More Posts

高人指點

comments