天才總係任性嘅,因為任性即自由

圖片來源:yahoo jp

早兩個星期五下晝喺Line news 見到武井咲結婚嘅新聞,晴天霹靂!之後嘅update仲話係奉子成婚,出年春天就做媽媽…21世紀最耀眼嘅新星,真正百年不遇嘅天才演員咁就以23歲嘅年齡止步。

佢嘅代表作《你教會我重要的事》上映時佢只係17歲,拍攝時更只喺16歲,令人驚艷到就算松隆子會降格同佢爭女配角都完全唔係對手。唔單止同劇嘅戶田惠梨香完全被比下去,喺再早一季戲份更少嘅《GOLD》亦都將長澤正美完全壓倒。要知道,長澤當年已經攞過哂新人獎、助演女優獎、主演女優獎,之後嘅一年亦即係2011年長澤更加初演舞台劇而且攞咗幾個電影嘅主演女優獎。之後,喺電視劇上佢已經係主演多過助演,而之後佢亦喺19歲就攞咗電影嘅新人獎,21歲攞最佳動作女演員獎。原本,佢要攞主演女優獎只係時間問題,有唔少改編劇本其實除咗由佢出演都好難搵到其他人演出。備受期待,翻演2005年由米倉涼子主演嘅2017年夏季劇《黒革の手帖》亦都獲得好高嘅評價,可惜…

其實,可惜只喺對佢一見鍾情嘅我嘅感覺。不過,我好清楚,常人嘅見解只係常人適用。如果作為一個常人難以想像嘅天才都要受常人見解限制,佢嘅成就亦不可能高於常人嘅想像範圍。一個社會嘅前景,某程度上就取決於佢對個人有幾大限制。能夠提供到自由發揮、不受限制嘅土壤俾人隨意發揮,令人才、天才可以將自己嘅想像力、才能推到極限,令社會向前多幾步,咁先至可以令果個地方比其他城市、國家都更出色。呢種土壤,其實日本係提供到嘅,所以喺各項領域、尤其藝術界,都有人才可以跑出。而呢種土壤,或者香港曾經有少少,不過近十幾廿年肯定愈收愈窄。其實話香港曾經有過咁嘅土壤已經好牽強,哥哥張國榮嘅2000年《熱情演唱會》我相信大家都有印象。畢竟,香港8、90年代所謂嘅影壇、樂壇黃金年代,前者跑出嘅只係杜琪峯、成龍之流,同藝術、創意無咩關係,張國榮以外亦無咩天才可言;後者好似主打改編歌,改編嘅就係日文歌。

所以,武井咲23歲結婚生仔,對演藝界嚟講一個絕世天才嘅提早止步係一大損失,對我嚟講係幾可惜,不過對佢嚟講,我為佢無受限制、無被影響嘅自由,咁早就可以獲得幸福,有圓滿嘅人生感到高興。我眼中最靚、最天才,無論美貌同演藝天分都無對手嘅武井咲,恭喜哂,祝你幸福!

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments