我在倫敦煲音樂劇之《Yank! A WWII Love Story》—— 歷史遺忘的二戰愛情故事

圖片來源:作者

重返倫敦嘅 Charing Cross Theatre 都幾有親切感,因為上年嚟睇過《Titanic》兩次,今年一月就嚟睇咗《Death Takes A Holiday》。呢個係一間頗有趣嘅劇院,喺正 Charing Cross 火車站下面,間中會有勁共勁共火車聲傳來,睇《Titanic》可以當係沉船聲,睇《Yank!》可以當係戰火聲,非常有 surround 效果。

劇院麻雀小小,座位只有二百六十幾個,雖然位處傳統上的 West End 範圍,但近來都被歸類為 Off West End theatre。呢啲小巧精緻嘅劇院勝在舞台同觀眾席之間距離特近,想睇大場面、幾十人歌舞連場就無喇,但係呢種人少少的 intimacy 亦是我所求,而且飛都賣得平好多呀,識睇其實非常抵睇。

講返《Yank!》呢套劇,2005年喺紐約 Off-Broadway 初演,今年三至四月喺英國曼徹斯特舉行歐洲初演,到七月搬到嚟倫敦 Charing Cross Theatre。副標題係《A WWII Love Story》,見埋海報就知道係二戰時期嘅美國士兵男男禁忌愛情故事——要知道當時美國軍隊對同性戀軍人嘅懲罰係坐三年監。

故事由一個現代三藩市少年發現一本二戰士兵嘅日記開始。日記屬於第一位男主角:十九歲都未夠嘅新兵 Stu(Scott Hunter 飾),年輕體弱膽怯純情,一生最愛係佢媽媽,同其他士兵講嘢都會口震震,一齊沖涼更加嚇到面青;第二位男主角係 Mitch (Andy Coxon 飾),英俊世故而又特別關心 Stu,喺軍營事事挺身維護佢,滿口甜蜜暱稱不特止,直情會坐喺佢身後溫柔地執 Stu 之手,教佢如何擦靚對靴⋯⋯

{~以下大劇透~}

好喇劇情發展至今,我天真地以為一定係 Mitch 哥哥情挑 Stu 弟弟然後二人攜手排除萬難啦;點知喺火車下格床,青澀的 Stu 酒後向 Mitch 示愛,二人情深一吻後,Mitch 至係嚇到碌落床嗰個!原來佢自命直男,一時間接受唔到自己對 Stu 有感覺,當晚之後對 Stu 不瞅不睬。

此時悶悶不樂嘅 Stu 偶遇軍隊雜誌《Yank!》gay 得好出位的攝影師 Artie,被佢睇中做 partner (in more than one way),搖身一變成為軍中記者,唔使上戰場打仗之餘,仲發現原來軍隊中隱藏 gay 友多的是,於是 Stu 喺 Artie 啟蒙下展開佢自己嘅 sexual awakening 旅程。

到後來 Stu 再見返 Mitch,久別重逢嘅兩人終於鼓起勇氣互訴衷情,Stu 更為咗唔同 Mitch 分離而主動要求上前綫作戰,呢段禁忌之愛又能否喺戰火中開花結果?

戰爭+forbidden love 嘅故事一向係我最愛,難得《Yank!》劇情不落俗套,雖然對日本嘅戰事並非劇情主線都有震撼之處,而 Stu 日記被發現遭禁錮迫供一幕更加睇到人心跳加速大氣都唔敢抖。演員們一致地出色,兩位男主角歌聲動人(又英俊)又 chemistry 爆燈,將兩個角色嘅內心掙扎演譯得恰到好處,二人嘅感情戲可能係我喺 musical 睇過最浪漫嘅畫面。另外值得一提嘅仲有一人分飾全劇所有女角嘅 Sarah-Louise Young,由 Stu 媽咪到性感女神歌星到能幹 lesbian 軍官都係佢,歌喉百變,非常犀利!

音樂方面,創作人明顯向經典音樂劇致敬,swing 曲風聽出耳油,散場後 “Rememb’ring You” 一曲嘅旋律歌詞仍喺腦海縈繞不散—— “No matter what I do, I keep rememb’ring you” —— Corny, right? 係 old school 嘅愛呀哈利!實在太浪漫了。而色途老馬 Artie 教 Stu 搵男人嘅 “Click” 踢躂舞一段亦非常好玩。

“Some stories didn’t make it into the history books.” 《Yank!》故事雖是虛構,但靈感確實來自二戰時 gay soldiers 嘅真實經歷。Stu 為愛自強,立志改變世界,縱使最後與情人塞上牛羊空許約(唉畢竟係四十年代美國呀),故事亦差點被歷史遺忘,仍不失轟烈。不禁自問:如果我生於該世代,設身處地,我會是看戰事多悠長亦決心打到尾的 Stu,還是找個歸宿平平淡淡纏繞的 Mitch?

P.S. 睇完《Dunkirk》同《Their Finest》,加埋《Yank!》完成自製二戰三部曲好滿足~

Tru@Tru.com'

Tru

一名戲迷在倫敦城西無定向非專業極主觀間歇性睇劇,現場睇過 Les Misérables 四十幾次而未厭,會無端端唱 Drink With Me (to days gone by)

More Posts

Follow Me:
Facebook

高人指點

comments