Minnesota Timberwolves十年選秀簡述(上)

Photo credit: www. hoopshabit.com

一隊NBA球隊要變強,一係喺自由市場簽入球員、一係用自己球隊嘅球員或者其他資產同其他球隊交易、一係就係選秀尋寶。一年一度嘅選秀會係大事,喺兩輪總共六十個選擇入面,球隊可以揀到稀世奇才未來王牌當然最好,揾到需要打磨嘅璞玉或者穩陣實用嘅角色球員都係有所斬獲,再唔係將選秀權交易換成現成戰力充實球隊亦無不可。至於要揀邊個抑或是要點樣交易,就好考球隊管理層嘅智慧同手段。以下就以2006年至2015年嘅Minnesota Timberwolves為例,簡略地睇吓十年內三個唔同GM(Kevin McHale, David Kahn, Flip Saunders)喺選秀會所做嘅選擇。以下球員名字加粗者係新秀年為T-wolves效力,加底線者係選秀會當晚至開季前被交易。

2006年

Brandon Roy,第1輪第6位(同Portland Trail Blazers交易成同年第1輪第7位Randy Foye
Craig Smith,第2輪第36位
Bobby Jones,第2輪第37位(同Philadelphia 76ers交易成2007年2輪選秀權)
Loukas Mavrokefalidis,第2輪第57位

就算係呢一年先開始留意NBA,都一定會知道Brandon Roy呢號人物,一個日後大放異彩嘅波特蘭英雄,事後諸葛咁睇McHale將得到手嘅大魚送走無疑係一大失誤。而唔知好嬲定好笑嘅係,換返嚟嘅Randy Foye大學成績同Roy不相伯仲,打嘅位置亦都一樣,NBA生涯就大相逕庭;因為傷患Roy由明星變流星,而喺T-wolves嘅Foye就始終唔能夠將潛力變成實力(當年當佢控衛咁養絕對靠害,不過題外話在此不贅),往後日子就係一個績效不俗嘅搶分專員。
Craig Smith整個生涯就係一個內線進攻手,冇咩耀眼表現但係紮實可靠,只係太矮而無法久留於聯盟;Bobby Jones最多人講嘅就係佢曾經一季內為五支球隊上陣過,係呀上場比賽呀記錄嚟架;最後嗰位嚟都冇嚟過,冇嘢可以講。

2007年

Corey Brewer,第1輪第7位
Chris Richard,第2輪第41位

佛羅里達大學Florida Gators完成咗史無前例嘅NCAA全國錦標賽二連霸後,包括五個正選在內幾乎半隊成員都一齊離校投入呢年選秀,當中天賦最好嘅Al Horford喺第3位被選中,然後手執第7位嘅T-wolves揀咗當年錦標賽最突出球員奬得主、可鋒可衛嘅Corey Brewer。至於點解係Brewer而唔係前隊友兼之前一年嘅錦標賽最突出球員Joakim Noah?除咗當時球隊缺乏小前鋒之外,另一個可能嘅原因係McHale選秀會前一個禮拜傾唔成,但一個月之後成真嘅一單歷史性交易:將Kevin Garnett送去Boston Celtics俾佢追逐總冠軍,交換Al Jefferson為首嘅五個球員。
歷史冇如果,冇人知Noah同KG或者Big Al組成雙塔會係咩光景,淨係知Big Al同Brewer仲有Foye係往後兩年混亂嘅日子中少數可靠嘅戰力。入咗NBA之後Brewer以拼勁同快攻聞名,一上場就真係同你搏盡,加上可以守到一至三號位,雖然數據上唔太好睇,咁多年來佢都叫做得到穩定嘅上場時間。前後兩次加埋五季身被T-wolves球衣,Brewer嘅偷波次數係隊史第三,單係呢點已經證明咗McHale嘅眼光。
相比之下,Chris Richard喺大學因為有Horford同Noah佔據住正選只可以做後備,而即使係大學強權嘅第六人都唔代表比其他人更有機會喺NBA立足,始終呢啲嘢好講天份嘅,Richard最終打咗兩季加埋七十場比賽就離開咗NBA。

2008年

O. J. Mayo,第1輪第3位(同Memphis Grizzlies交易成同年第1輪第5位Kevin Love
Nikola Peković,第2輪第31位
Mario Chalmers,第2輪第34位(同Miami Heat交易成2009年兩個第2輪選秀權)

McHale喺今次選秀會再一次證明佢揀内線高佬係有料到——尤其係trade down選秀權揀Love,由被唔少明尼蘇達鄉親鏟到上天,到人人稱頌係球隊史上一大交易勝利——仲要一次揀到兩個,如果唔係傷患問題同之後接McHale手嘅David Kahn,或者一隊西岸強權就係從呢次選秀會成形。
先講Love,大學時同Russell Westbrook先幫加州大學洛杉磯分校UCLA Bruins贏得Pac-10聯盟(依家叫Pac-12聯盟)錦標賽冠軍——巧合嘅係決賽對手係陣中有O. J. Mayo同Taj Gibson嘅南加州大學USC Trojans,再闖進全國錦標賽四強,兼名列全國第一隊,係當年數一數二嘅內線球員。入到NBA後更加一路進化:初期同Big Al位置重疊互相排擠,10年暑假送走Big Al之後扶正為球隊重心立即爆發,一場31分31籃板球又得、入選明星賽又得、打破連續雙雙記錄又得、成為當季籃板王又得、贏最佳進步球員獎又得,總之就得咗。
之但係咁嘅成績都係得唔到Kahn嘅寵愛,拒絕offer頂級條款嘅新秀續約俾Love,而佢都因為咁開始同管理層唔咬弦,久唔久就透過傳媒放炮;而球場上佢依然展現主將級身手,愈來愈可靠嘅三分投射令本身已經係籃底怪獸嘅Love成為聯盟一大頂級武器。可惜種種原因T-wolves始終都係入唔到季後賽,Kevin Love同球隊亦緣盡於2014年,8月23日佢被交易到有LeBron James回歸嘅Cleveland Cavaliers——然後16年第二次打入總決賽就成功贏咗。
到Peković,如果唔係當時佢同彭拿典奈高斯Panathinaikos新鮮熱辣簽嘅約有啲麻煩(主要係人工仲高過首輪中後段新秀嘅人工上限),以Pek喺歐洲聯賽展現嘅實力一定唔止第二輪。2010年嚟到NBA時因為有Darko Miličić(係呀就係2003年選秀會最大笑話米歷柒呀)而上場機會有限,到第二季Miličić傷出令Pek有足夠空間發揮佢六呎十一吋加上三百磅左右嘅身軀所帶嚟嘅破壞力,三季以來都保持平均13分以上,同Love成為聯盟中火力最強嘅内線組合之一。
得三季?係呀咁短時間喳,除咗因為Love 14年暑假就離隊之外,佢同Peković都受傷患困擾,當中Pek更加係冇一季打多過六十五場。玻璃腳嚴重影響佢嘅生涯,2016年1月31日之後Pek再冇上過場,再加上之前當年發跡嘅柏迪遜KK Partizan選咗佢做球隊主席,基本上就係等掛靴。
講埋其他兩位,O. J.都唔知話佢抵死定運滯好,轉職業之後愈打愈頹,仲因為過唔到藥檢而被聯盟停過兩次:第一次係因為「誤服」類固醇DHEA而停十場;第二次冇講明係咩,但係停得兩年都應該唔係一般嘢。仲有一年波監要坐嘅佢應該都前途似咁、Chalmers就天生冠軍命,大學三年級時堪薩斯大學Kansas Jayhawks第八次殺入全國冠軍賽,就係靠佢射入關鍵三分將比賽逼到加時,最後仲擊敗由Derek Rose領軍嘅孟菲斯大學Memphis Tigers;到打NBA第二季就遇上LeBron James同Chris Bosh加盟同好兄弟兼熱火一哥Dwayne Wade組團,跟住四年攞咗兩冠,難怪佢可以自稱聯盟前十控,咁順風順水好難唔自大嘅係咪?

以上就係Kevin McHale身為T-wolves籃球事務話事人最後三年喺選秀會嘅成績表,下一篇就係David Kahn嘅黑暗四年。

chester@chester.com'

查斯特

其實比起表達,我更擅長聆聽。

More Posts

高人指點

comments