高脂飲食無罪第三部曲

Photo source: http://www.njlifehacks.com/high-fat-diet/

上一次第二部曲提及嘅《Good Calories, Bad Calories》一書期實已經睇完好耐,終於的起心肝寫埋第三部曲。作者提及其實美國推廣少肉多碳水化合物,係源自60年代嘅左翼思潮,認為只要美國人食少啲肉就可以令更多發展中國家嘅人可以食得飽(唔好問我個邏輯喺邊)。

呢個思潮同提出降低膽固醇可以減少心臟病比率嘅萬惡Ancel Keys上到位有一定關聯,而之後就正如《The Big Fat Surprise》所講,學術界同政府完全唔考慮相反意見。學者George Mann喺1977年嘅The New England Journal of Medicine講明,peer-review system rewards conformity and excludes criticism。而National Institute of Health 直情認為持相反意見嘅研究唔值得批funding。

除此之外,喺1985年同樣刊登於The New England Journal of Medicine 嘅paleolithic diet(舊石器時代飲食/洞穴人飲食),相關學者亦誤以為只包括20~25%脂肪。直至2000年兩位學者之一同新拍檔合作時考慮到舊石器時代人唔止連內臟、舌頭、骨髓都會食,仲會先選擇最肥嘅部位嚟食,飲食嘅脂肪含量可能高至約58%,上、下限都高過碳水化合物。

之後分別喺Framingham,Honolulu,Evans County,Puerto Rico同瑞典嘅Malmo嘅大型人口研究都指出低膽固醇飲食同高癌症比率有關聯。喺1986年日本嘅醫生提議升高膽固醇水平,因為低膽固醇同出血性中風有關。

之後就到出名嘅愛斯基摩飲食喇。今次同《The Big Fat Surprise》一書唔同,係由學者Samuel Hutton研究,發現傳統愛斯基摩飲食嘅人基本上唔會患上歐洲常見嘅疾病,包括癌症、哮喘、盲腸炎。唯一例外係跟咗移居者個飲食習慣,食麵包、餅乾、鹹肉、鹹魚嘅一個年輕愛斯基摩人。

根據美國National Health and Nutrition Examination Survey 嘅研究,喺已發展國家窮人嘅痴肥比率比有錢人高好多。喺1965年,Albert Stunkard喺New York Hospital嘅調查發言,窮女人嘅痴肥比率係30%,而有錢嘅係5%;男人分別係32%同16%。同期有研究指出,窮女人每日只食少於聯合國建議嘅2000卡路里,當中有65%係碳水化合物,只有21%係脂肪。

1973年,University of West Indies, Kingston嘅Rolf Richards研究,牙買加有10%男人、三份二嘅女人痴肥,而佢哋係窮到營養不良係嬰幼兒死亡主因之一。

1976年,東京大學研究日本相撲手嘅餐單,而且喺The American Journal of Clinical Nutrition刊登,將專業相撲手分成upper group同lower group,對比佢哋個餐單。Upper group每日食5500卡路里,780g係碳水化合物,100g脂肪,365g蛋白質,同普通日本人比,卡路里、碳水化合物係雙倍以上 ,脂肪啱啱唔夠雙倍,而蛋白質係四倍半(分別係2279卡,359g碳水化合物,50.1g脂肪,82.9g蛋白質)。碳水化合物佔57%,而脂肪只係16%,分別比美國嘅建議仲高同低好多。而lower group同upper group一樣係三百磅以上,但更加肥,而且肌肉少啲。Lower group平均一日食5120卡,1000g係碳水化合物,165g係蛋白質,脂肪低到50g,亦即係話碳水化合物接近80%,脂肪只有9%。

睇到呢度係咪好驚?更加驚嘅係書中有實驗證明,只食脂肪同蛋白質,一日嘅卡路里係好難超過3000卡路里嘅;而有食碳水化合物嘅,菲比斯出名可以食12000卡。

最有趣嘅係,係人都知痴肥比率近二、三十年急升,雖然美國特別誇張,但並不限於美國。美國嘅官方講法係城市人愈食愈多而且愈嚟愈少運動,我哋先唔好理其實工業革命之後城市人嘅運動量已經係咁低,19世紀末、20世界初嘅工廠工人、服務業人士運動量唔會高過今日幾多(技術上直情係少好多,當年根本唔興長跑,更加唔會周圍都係gym),最重要嘅係食量:19世紀末嘅普遍食量其實係大到嚇死人嘅。喺1880年代後期,一般country house嘅早餐有魚、家禽或野味;腸;肉類,例如羊或牛;奄列或其他蛋;各類麵包;兩、三款果醬,如果啱season仲有水果;仲有各類凍肉,例如凍肉冷盤、肉派、火腿之類。聽落豐富過現代人去酒店食dinner buffet好多,仲要係每一朝都有。吖,話時話,無人話19世紀、20世紀初嘅貴族運動量大過宜家嘅城市人,想知詳情可以參考番Downton Abbey。

最後,以書中提及喺1960年代中期已經established beyond reasonable doubt嘅四個facts作總結:1. 碳水化合物係令胰島素分泌嘅主要原因。2. 胰島素係令脂肪積聚嘅主要原因。3. 脂肪過量積聚係需要飲食中攝取碳水化合物嘅。4. 二型糖尿病同痴肥人士血液內有不正常地高嘅胰島素量,而且胰島素對飲食中嘅碳水化合物有極大反應。

正如前兩部曲講,喺80年代美國官方endorse低脂高碳水化合物飲食,而且呢種飲食方式成為美國營養學界唯一聲音之前,其實碳水化合物導致各類型文明病(diseases of civilization)、低碳水化合物係減肥唯一方法係醫學界公認嘅真理。仲係想知多啲嘅,可以自己搵《Good Calories, Bad Calories》同埋《The Big Fat Surprise》兩本書嚟睇,加埋都只係七百幾頁,一個weekend閉關都應該夠睇得八八九九。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments