識玩《世紀帝國》嘅都係絕世好仔……

未聽過《世紀帝國》係咩?唔緊要。簡單嚟講,你可以理解佢為一隻「好耐世紀以前出版但最近重製嘅帝國遊戲」,所以又稱「世紀帝國」。點樣玩、遊戲有咩特色、好玩在邊度呢啲問題,都唔喺啲咩重要嘢,亦不屬本文嘅探討範圍。重要嘅係,《世紀帝國》呢款遊戲隨時可以成為你搵另一半嘅參考指標,條公式係咁嘅:只要識玩已經可以算係唔錯嘅男仔;而玩得愈勁,就愈係好男仔。依家同大家分析下點解。

博學
「上知天文、下知地理」,識咁多嘢嘅男仔聽到都覺得吸引,但玩《世紀帝國》嘅男仔,識嘅遠遠唔止咁少。由古代帝國嘅兵種、文化特性、建築風格甚至科技樹,到世界能源分佈、野生動物生態、農務發展,以至投射物彈道距離、外交政策、城市規劃呢啲高深知識。只要你講得出,佢都一定識。同咁博學嘅人喺埋一齊,除咗唔需要擔心無話題之外,你更加可以從嶄新嘅角度去認識呢個世界。

擅於經營
玩《世紀帝國》叻嘅人,都係經營方面嘅人才。點樣由零開始發展業務、運用有限資源去打好基礎,再穩中求變擴大優勢、並喺業務失利嘅時候及時止損……對玩慣《世紀帝國》嘅人嚟講,簡直係手板眼見功夫。擁有咁出色嘅才能,可見佢事業首先唔會差得去邊,經營「愛情」呢種長期關係更加唔會有難度。點樣令關係穩定發展?愛情短期長期有咩威脅要優先化解?成家立室之後點樣分配家庭開支?識返個「世紀帝國好仔」,你擔心嘅呢啲問題,好快會迎刃而解。

高EQ
再叻嘅人如果脾氣差,都唔會係好伴侶;但「世紀帝國男」久經鍛練下情商極高,絕對係好脾氣又令人有安全感嘅另一半。被至親嘅人背叛、辛苦建立嘅成果一朝摧毀、抵抗宗教團體洗腦……乜嘢大風大浪佢全部都面對過,歷盡滄桑嘅佢,試問又點會忍唔到你嘅公主脾氣、甚至「一哭二鬧三上吊」呢?錯過就真係走寶啦!

文章篇幅所限,其他優點就交俾你自己慢慢發掘喇。當然要留意番,硬幣總係有兩面:因為玩《世紀帝國》好多時都講求效率,要求「封快、城快」,想再快啲又要搵快捷鍵幫手,乜都要快,所以對方可能現實中某啲嘢都會慣咗出得快……不過既然有上面咁多優點,呢啲應該只係小問題啦。好似係?

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments