想創業成功?你首先要知道嘅一件事

cc photo by flickr user Freedom II Andres

最近有90後出書分享「創業月賺10萬」嘅經歷,本書開價千八蚊,原因係可以換取同作者面談10分鐘嘅機會。值唔值固然見仁見智,傾完係咪真係咁「影響人生」亦大概要見過先知。但關於創業書,其實想創業嘅人都應該知一件事。

就係,唔好睇太多創業書。

喺呢個「鼓勵創業」嘅時代,市面上有太多《如何每月輕鬆賺XX萬》《X個創業成功法則》《創業你要知道的XX件事》之類嘅書,無可否認當中嘅某啲書可能俾到你啟發,但極端啲講大部份其實都冇乜閱讀價值。

讀呢類書,往往最容易墮入常見嘅「倖存者偏差」陷阱,過份聚焦書中成功者嘅成功經驗,而忽視現實中無數人做嘅嘢同書入面類似,但最後都以失敗告終。特別係創業書通常都係創業者以個人角度出發、對自己成功經驗作出總結,再配上一堆理論或者反思包裝而成,只算得上「味精雞湯」,並無實際「營養」。

睇呢類書唔係唔得,可以當係開下眼界、擴闊思考角度,但千祈唔好當係參考書咁跟足或者盡信。要知道,創業永遠無法則。大環境、機遇、運氣甚至創業者本身性格,都會影響到最終嘅創業結果,本來就冇重複實踐同模仿嘅可能。

而就算要睇,都最好睇啲有真材實料嘅創業書。譬如睇啲涉及商業模型、思考系統或者營銷策略呢類可以將知識實踐嘅書,好過一味睇啲根本係人哋用嚟自High嘅「發跡史」。一本書叫你逆境時要進取、一本又叫你保守等待時機、一本叫你保守住咁進取……睇太多創業書,有時唔單止俾唔到你清晰嘅方向,反而會窒礙你行動嘅決心,絕對係百害而冇一利。

「我覺得自己嘅人生就係一本書,任何嘢我寫落去呢本書,都會成真,而冇可能失敗」90後創業家如是說。任何創業者有自信都係好事,但可以肯定嘅係,世界上冇嘢係冇可能失敗嘅。而與其睇十本幫唔到你成功嘅創業書,不如去實際創一次業,即使最終失敗(或者成功),學到嘅嘢一定仲多。

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments