餐廳最忌出咗名

圖片來源:蘋果日報

最近新舊容記小菜互數對方不是,身為盡責港豬如我當然係食住花生睇戲。佢地之間嘅恩怨情仇我唔喺度多講,不過眼見好多出咗名嘅食店喺香港好多時都不得善終,而最大受害者當然係我地依班只係想搵啖靚飯食吓嘅市民。就等我歸類幾個原因同大家講吓,到底係咩原因搞到香港依個美食天堂愈嚟愈冇啖好食。

錢喺而家個世界有幾重要係人都知,所以好多人都會用盡一切方法搵錢,包括業主。當一間食店出咗名自然會吸引多咗客人,喺業主眼中依個係最好嘅加租理由,因為賺到嘛。結果你依頭每晚開始多咗幾枱客,但轉個頭就比人加咗十萬八萬租,如果你賣緊幾十蚊碗麵,一百蚊樓下小菜,搵多咗嘅錢冇可能夠你交多咗嘅鋪租。喺依個惡性循環之下可以係香港站得住陣腳頂得順旺位鋪租嘅就得返大集團或者連鎖食店,單憑沙田淨係好運、沙田中心、沙田廣場依三個連住嘅商場已經有三間譚仔就已經睇到依個問題帶比市民嘅慘況(我仲未講行過小小希爾頓仲有兩間⋯⋯)。

當然,你可以話出咗名可以做起發圍都有,好似三多、添好運同華嫂咁唔單止冇比租金打殘,仲開到好多分店。不過大多數食店好多時都唔可以喺發展同質素當中搵到平衡點,當鋪頭愈開愈多嘅同時食物質素都會好自然咁下降。最好嘅例子又要用返譚仔,我記得幾年前就算係個清湯底都有種清甜嘅味道,炸醬更加係不二之選。直到有一日我發現譚仔轉咗隻難食到喊嘅炸醬,清湯亦愈嚟愈淡同味精,而家唔係冇嘢好食我都唔會行入譚仔;曾經拎到美芝蓮推介嘅添好運都已經變到平平無奇,由街坊美食變成旅行團必試,再係咁落去我怕連唐記啲急凍點心都好味過佢。好多時決定食物嘅質素係個師傅而唔係個招牌,當你分店愈開愈多,但有料嘅師傅仲係得總店嗰個,間餐廳熱潮過後就只有等執一個結局。

當然有啲餐廳出咗名之後冇開分店,原班人馬繼續喺一間鋪入面做,但唔知係咪因為多咗人去唔愁冇生意,莫講話加價快過火箭,食物質素仲係直插式下降。如果你四五年前食過四季煲仔飯,當你而家再去嗰陣你會懷疑入錯門口:價位加咗成倍咁濟、個飯唔係有飯焦,嗰啲應該直接叫炭、煲嘢難食嘅地步係Gordon Ramsay會成煲嘢扔落地然後講幾廿個「Fuxk」字。埋單見到條唔應該出現喺四季嘅數,食咗堆唔應該喺四季食到嘅嘢,你心諗你今晚唔知做咗啲乜,更加唔明點解出面仲排哂長龍。

喺香港基本上每多一間餐廳出名就代表我地又小咗一樣嘢食,唔係過兩年執笠就係再食唔返原整水準。我唔識教你點喺香港搵好嘢食,但我可以教你點樣避開個伏:但凡係X假期,XX男女之類有提過嘅,不去也罷。

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments