遲咗兩年嘅「白痴先搞美食車」

話說前財爺2015年掟美食車呢樣嘢出嚟嘅時候,作為一個商界奇才我係第一時間屌出聲嘅。可惜果期啱啱返對上一份工無耐,無特別寫文講解。既然呢期咁多相關新聞,我不妨講下美食車點解注定搞唔掂。

其實唔洗去過美國,只要睇過美國節目,就一定見過美食車喺邊度出現。無錯,沙灘、大型公園都會見到,通常會係任何時間都有不少於二、三十人排緊隊嘅,最緊要方便人聚集。我印象中《Master Chef》第三季就有一個比賽喺美食車舉行。有無留意問題喺邊?多人排隊。喺香港,有人流嘅街道係無可能俾你泊㗎車喺度再俾條行人路你排嘅,就算未有自由行嘅年代都無可能,唔好話宜家,因為香港人流多嘅地方,就唔會係二、三十人排緊隊,係二、三百人排緊隊。我就無排過一蘭嘅,但相信大家都記得一蘭開嘅頭幾個月有幾多人排,好似要排四個鐘。你想像下,喺weekdays有無可能喺海防道、東角道泊架美食車喺度,有無可能排三百人喺條街度而唔塞到阿媽都唔認得?

 http://www.mymatting.com/food-truck-kitchen-floor-mats.html


http://www.mymatting.com/food-truck-kitchen-floor-mats.html



咁,我哋照學美國喺沙灘擺架車得唔得?嗱,石澳夏天就一定夠客嘅,冬天有無可能每日有一千人去石澳就…赤柱呢?一年365日都有,不過去嘅好似鬼佬多過自由行。你唔係諗住鬼佬幫襯你food truck下話?搞埋去西貢愉景灣吖笨~

好喇,即係本質上就算無條離地數成件事都唔可行。之後梗係講條數啦。一開始就話淨係架車,入場費都六十萬,淨係講緊附合最低安全標準。咁你幫架車化下妝又貴少少,計埋營運成本即係一百萬無走雞啦?咪玩啦,有一百萬仲洗同你玩美食車?你㗎車入面有幾多呎?150呎?我當你租旺區租到600蚊呎都係九皮嘢租喳喎。兩個月按金一個月上期都係廿七萬,買埋爐具做埋裝修洗唔洗四十萬?租間舖唔多客過你?燈油火蠟人工食材一樣,但唔洗入油喎間舖,你架車收檔仲要租地方泊。放心啦,新車無咁易壞嘅,果筆唔洗計…

圖片來源:Buffalo News

圖片來源:Buffalo News

好喇,講完成本,就到啲兩年前講就精彩,兩年後係人都知嘅嘢,無辦法,要全面啲嘛。美國美食車賣咩多?熱狗、漢堡、Taco之類。最緊要平、方便企喺街食,甚至一路行一路食,可以當一餐正餐,或者最少當下午茶嘅,而又夠平,咪有人專登走過嚟食囉。係啊,幫襯美食車,就係貪你成本低過租舖,可以賣得平,你一樣咁貴甚至更貴做咩要幫襯你?係啊,你有本事賣十二蚊隻熱狗(唔係腸仔包啊頂你),十五蚊個漢堡包,個餡同足三両一樣咁厚嘅,你睇下有無客?你泊商業區我都包你lunch十二點到兩點賣到三千份,如果你整得切嘅話…我仲可以包你早餐下午茶甚至晚餐都有生意添,一日八千份無難度,如果你做得切。咁當然,呢個價位你無錢賺係你問題,唔好問我。係啊,美食車真係要鬥平,宜家商業區四十蚊想食個lunch都難,食到都分分鐘同食屎差唔多,你俾人廿幾蚊食到兩隻靚熱狗,三十蚊兩個足三両,仲要快過麥記,你要幾多客有幾多客。你知唔知老麥最衰係咩?唔係入中國食材,係慢啊!喂,我食快餐你要我排十幾分鐘,仲要排兩次?你無病下話?美食車呢?煎條腸或者煎塊本身熟嘅漢堡扒搭落個包度要幾耐?5秒唔得,都唔洗10秒。再唔係,後面煎前面夾,同一時間煎三十塊扒,peak hour前預熱一批,peak hour辣兩辣,簡直係零難度。點解人哋喺美國係驚自己手腳唔夠快,你係無客?除咗位置差,價錢都係重點。你夠平,行15分鐘都嚟幫襯你。

http://mobile-cuisine.com/social-media/food-truck-event-traffic-social-media/

http://mobile-cuisine.com/social-media/food-truck-event-traffic-social-media/

至於啲死位…我唔知邊個定㗎啦,定得咁智障。不過事實上,海洋公園果架如果可以洗入公園入面泊又真係唔怕,宜家海洋公園賣緊咩話?百二蚊個燒味飯定餐蛋飯?至於中環,果個的確係神位,喺中上環要搵一個10分鐘步行路程之內無三十楝商廈嘅位真係好難,除咗佢應該得禮賓府。連交易廣場個位10分鐘內都有三十座商廈,海港政府大樓10分鐘都夠行到去信德、中環中心、IFC One啦。

咁點解成件咁智障嘅事有人落疊?好似話係啲飲食集團老闆話百幾二百萬當賣廣告濕濕碎喎。係啊,香港係全世界最自由經濟體,十秒鐘度條值幾千萬嘅橋果啲就搵緊萬幾兩萬幾一個月,個腦裝屎果啲就喺市值幾千萬、幾億甚至幾十億嘅大集團揸緊旗。蠢過腦裝屎果啲點算?唔緊要,仲有民主黨同民建聯搶住吸納你,補充新血。驚大黨無位上?唔緊要,社民連、熱普城一樣熱愛智障㗎。喺香港,只要你夠蠢就大把機會。聰明?你老豆係邊位?

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments