其實工聯會個柒位唔係七個月不吃不喝

話說,工聯會早前公佈咗個調查,話只要二人家庭每人月入一萬六千,不吃不喝七個月,就可以成功上車。好多人恥笑工聯會點樣不吃不喝七個月,其實同工聯會犯咗同一個錯誤,唔識英文、無國際視野。其實喺國際上係有呢個標準,不過個重點唔同,表達出嚟嘅嘢就唔同。

其實市場上有個公信力好高,國際傳媒都引用嘅年度調查報告叫Annual Demographia International Housing Affordability Survey,最新出果期係今年1月24日出嘅第13期,香港自從有參與之後已經連續七年排榜首。佢哋嘅計法係用住宅價格中位數除家庭年度收入中位數,攞個中位嘅倍數嚟計。香港最新數字係18.1倍,即係不吃不喝18.1年先換到個住宅單位,比起一年前嘅19年係改善咗嘅。「先買到」同「就買到」就係個分別所在。唔好誤會,我唔係睇錯樓價同首期嘅分別,我講嘅係咩叫國際標準啫。之後我會再講工聯會點柒法。

好喇,跟住就係工聯會個柒位喇。首先,我唔知佢個二人家庭每人月入萬六喺邊度嚟。政府最新嘅數據係去到2016年第三季,個人月入中位數係萬五,不過二人家庭月入中位數係低過二萬:二人家庭總共672,300戶,而月入等如或低於$19,999嘅佔咗347,500戶。咁當然,政治正確,我哋唔可以公開歧視人蠢嘅,咪讓下佢,25至34歲嘅月入中位數係萬六,咁我哋假設25至34歲搵唔到個同樣25至34嘅人結婚係廢青,用佢果三萬二嚟計囉。

好喇,咁佢話夠做首期,問題喺邊呢?首先,喺借錢度。呢個數唔係要借九成,係要借九成半。唔好擔心利息上升同供幾耐住,唔係呢篇文嘅重點。亦都唔係呢個價錢買到嘅樓唔裝修住唔住得人,雖然應該唔得,而係市場上係咪真係存在佢講嘅近半300萬以下居屋,係又會有咩事發生。

housing_main_1024

公屋王:2015年10月,峰華邨,598呎440萬。2015年5月寶琳邨,490呎430萬,2013年華貴邨420萬。

居屋王:2015年3月,家維邨,800萬。樂翠臺,790萬。2015年2月,康山花園,755萬。健康邨,730萬。

d3db6b0a

我知,居屋王公屋王係大單位嘛,可能細單位平啲。不過個問題係,工聯會知唔知公屋居屋要補地價先?三百萬樓下補咗地價未先?劏房公屋王,鳳德邨153呎成交價係190萬喎。好啦,我哋唔蝦蠢人,又當佢真係有啦。不過,$2,176,470或以上stamp duty3%喎。我哋假設真係有已補地價居屋賣250萬,咁點計呢?Stamp Duty,七萬五;經紀佣金,二萬五,律師費若干。我假設經紀連買居屋都肯收平你少少啦,夠你cover律師費。咁即係呢度十萬,5%首期係十二萬五千,加埋廿二萬五千。三萬二乘七個月係幾多話?廿二萬四千。無事嘅,借一千蚊囉。咩話?經紀話太平佣金無得折?借多幾千囉。要裝修?傢私太舊?借錢囉。咩話?原來按揭借唔到九成半?係啊,其實邊個話借到?

咁即係點?即係如果你月入係青年月入中位數,搵到人係嫁/娶你,佢又係月入中位數,就算俾你搵到間補完地價都係250萬或以下嘅居屋,你唔飲唔食七個月都係買唔到樓,因為做唔到九成半按揭。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments