矛盾唔係錯:點解我哋需要一致性?

cc photo by flickr user Ryan H.

cc photo by flickr user Ryan H.

大家唔好以為「矛盾」就一定係錯,「一致」就一定係啱。兩樣嘢各有所用。

稍為學過邏輯嘅都知道,任何邏輯系統如果有 X ^ ~X,咁就可以推斷到任何陳述(statement)。一個推斷到任何嘢嘅邏輯系統,用嚟尋找真理未必有用,但好多時,我哋唔係想尋找真理架嘛。例如,一個政棍,可能今日支持某立場,聽日就反對。咁只要佢處理得好,支持嘅好處佢又得到,反對嘅好處又得到。只要佢用一個充滿矛盾嘅邏輯系統去敍事,就必定如有神助:搬龍門、轉立場、馬後炮,乜招數都可以用。呢啲就係「矛盾」系統嘅作用。所以學邏輯學嘅朋友,唔好因為發現咗矛盾,就當完咗件事。矛盾係實實在在嘅妙用,大家千祈唔好輕視佢。

咁但係,如果「矛盾」咁好用,大家研究邏輯一致性又有咩謂?不如接受咗 X ^ ~X,然後收工啦,咁咪幾好?你可能話,咁總有啲嘢係真,有啲嘢係假架嘛,尋找真理嘅人,點可以馬虎呢? 呢個係一個原因。但,世界上究竟有冇客觀嘅真理,講唔埋。就算有,係咪可以靠正確、唔矛盾嘅邏輯去推斷出嚟,真係好難講。Gödel 乜乜乜呀嘛。

咁邏輯一致性有咩用?好簡單,就係集中力量,有效咁使用力量,唔好俾啲力量互相抵消。例如,一個人如果同時又想向北行,又想向南行,我哋話呢樣嘢係自相矛盾。自相矛盾嘅結果,唔係邏輯系統大爆炸,而係,佢寸步難行!可能佢向北行幾步,又向南行幾步,最後力量互相抵消,就變成原地踏步。呢個先至係矛盾嘅問題所在!

所以我哋可以概括而言之:想玩大包圍,要用矛盾嘅系統;想要有強大嘅力量去推動現實世界嘅改變,想法就要有一致性。

點解我哋(或邏輯學家)會認為一致嘅系統先係「正確」嘅?因為,一致嘅系統實踐起嚟,有強大嘅力量。正所謂 might is right,世事就係咁簡單。

散彈一號

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

More Posts

高人指點

comments