大師兄:洗腦課程(六)

cc photo by flickr user tokyoform

cc photo by flickr user tokyoform

上集提要:大師兄借貸5萬,讀咗足足兩個月終於學成歸來,準備向公司同事齊齊洗腦。

「呀輝,你行過去個到女仔丫!」大師兄指住一位同事呀輝,示意另一邊有位年輕貌美嘅少女正係到煲緊煙。

「下?」呀輝完全唔知發生咩事,望住我同其他人。

「你過去問佢拎電話。」大師兄眼神堅定咁望住呀輝:「呢個係你走出Comfort Zone嘅第一步!」

「咪玩啦……」呀輝已經有少少不悅。

「其實我留意到個女仔頭先有望住你。」大師兄面露笑容咁講。

屌你咩!我地頭先嗌到成條街都望住我地啦!呀輝都知,但佢都係過咗去問個女仔拎電話。

經過幾分鐘嘅等待,呀輝嘅答案令我地都喜出望外。

「哈哈哈哈,佢真係比咗我啵。」呀輝傻傻下咁講。

「黎!大家比啲掌聲比佢!我就係想大家去嘗試一啲你只敢想而唔敢做嘅嘢,依家呀輝已經成功咗啦!!」大師兄食住個勢就繼續使用「鼓舞」。

--

「無呀,頭先個女仔問我地係咪大學生玩緊O CAMP遊戲,我諗都唔諗就答係,佢話為免我被人閹個袋,就話比我,不過叫我唔好玩佢電話啵!」我私下問呀輝了解真相。

呢個巧合大師兄同我都無預料到,不過做得銷售就係預咗對方拒絕,而呢個亦都係呢個遊戲嘅真相。

呢個遊戲就係叫一眾學員係公眾地方下做一啲平時唔敢做嘅嘢,例如問人拎電話,大叫,唱歌,跳舞,如果再深層次嘅可能會叫你除衫或者打丁。

目的就係令你覺得消除正常人嘅羞恥心,同尷尬,令你覺得被人拒絕又或者「做自己」其實唔係啲咩大問題。

正如我話,人係習慣嘅動物,只要慣住一樣嘢你就會覺得無咩問題。

目的就係令你習慣被人拒絕,同人地歧視嘅眼光。

隨住呀輝嘅成功加上大師兄嘅「吹功」了得,好快除咗我地條team,其他人都開始進行呢種洗腦課程嘅遊戲。好快大家就進入「禮義廉」嘅新時代。

【傳道人】

厚面皮的確係做銷售(騙子)嘅首先條件,正當大家開始醉心訓練自己要再CY一啲,大師兄就開始玩進階遊戲。

經過兩日嘅街頭訓練,大師兄仲請咗佢洗腦課程嘅同學-Connie。
Connie係一位金融……從業員,從佢金色嘅秀髮,超級大眼仔同低胸短裙都我幾敢肯定佢係一位金融………………從業員。

作為異教徒嘅我,一眼就睇得出用意何在。尤其全男班當中,有如此美女加入一定士氣大增,佢地眼中以為羊入狼群,事實只係虎入羊群。

「大家好,我係Connie,黎緊我會同大師兄一齊係到呢到同大家進修銷售技巧同更增強大家嘅工作信念架,哈哈,希望你會聽我話啦。」

幾聲假笑加埋陣庸俗嘅香水,在場嘅七成男人都應該中咗招,而其他女同事亦表示羨慕Connie又靚又叻,手錶手袋名牌香水乜乜柒柒。

只有我同幾位同事繼續冷眼望住佢地。

Connie就叫我地每人依家落街買本雜誌或報紙,呢個時候Connie就當住眾人眼光,問我係邊並且行到我面前,笑露笑容地向我打招呼,但講話一刻,佢所有散發出黎嘅殺氣,絕對唔簡單:

「你就係呀吹啦嘛?我聽過你嘅事,我知道你對我地做緊嘅事未必有興趣,如果你無興趣我建議你立即走。因為我唔想係到做嘢嘅時候,有人騷擾到我地嘅進度,你明白我講乜架可…….Peter Chan?」

我望住遠方嘅大師兄同呀星,向佢地舉起姆指,Connie 就繼續講:

「我做嘢好專心,亦都可以好恨心,我唔會好似豬扒小姐咁易放走阻住我做嘢嘅人。」

我冷笑一聲:「咁你千其唔好放走我啦,因為我唔捨得你架。哈哈」我轉頭就走。

其他人見到Connie同我單獨咬耳仔後,不斷地表示羨慕之餘,仲問我究竟發生咩事?我只係簡單說明佢之前見過我,希望我會努力加油個類廢話,因為個一刻,我已經認為好多人都信唔過,而同時真係好撚嬲!

我只係同咗仲未被洗腦個幾位同事講返Connie嘅對話,包括差啲信埋一份嘅呀輝。點知佢地聽完比我仲嬲,仲話要上去強姦佢!哈哈哈。

(其實呢幾位同事係大師兄嘅中同同學,亦都係我認識嘅朋友,當然佢地都係一班MK)

佢地聽到我受到恐嚇加上大師兄同呀星嘅背叛,自然著火,佢地仲話要帶頭上去玩串個PARTY。

係我極力勸阻之下,大家係樓下達成共識。

原因就係:我地上去就係咁屌,唔好玩亦都無用;一路睇下佢地搞乜家科,了解哂敵人做乜,先至可以一下子摧毀佢地架嘛!

「咁依家點做?」呀輝問我。

「假意投誠!」我好似孔明上身咁~哈哈!

究竟洗腦課程下一個階段會玩乜?Connie對我會唔會有不利?(其實都多9餘,有不利我唔會係到寫嘢比你睇啦)
我地又點樣假意投誠?請繼續留意下集。

blow@king.com'

吹水皇

港豬廢青一名。 只想吃喝玩樂不勞而獲 不求踏實地但求公屋有期。

More Posts

Follow Me:
Facebook

高人指點

comments