和歌山Marina City一日遊

最近啲電視台嘅旅遊節目真係睇到返唔到轉頭,尤其是花生含量極高嘅≪矛盾≫!咁當然唔少得≪關西攻略≫啦!前一排介紹和歌山嘅黑潮市場,而咁啱有朋友問去唔去和歌山旅行,我就即刻答應仲拿拿聲book hostel,然後就出發去和歌山。

一到和歌山,真係靜到好似死城咁,唔講以為自己去左拍walking dead…之後就出發去和歌山城同埋黑潮市場,由於我本人地理奇差,錯誤地以為由紀三井寺站行去黑潮市場位於嘅Marina City只需要15分鐘,但其實至少係要行成50分鐘先到..所以我就欺騙左我朋友同我一齊行入去。沿途有得望住個海吹住好勁嘅海風行,都叫做幾正嘅!因為京都係內陸城市,所以我喺度住左咁耐就有幾耐冇望過海同吹過海風。

所有圖片來源:作者

所有圖片來源:作者

入到去Marina City就即刻揾下間梅酒鋪喺邊,而我好好彩行左冇耐就揾到之餘仲見到好多好似好正嘅魚生!但係望到價錢….唉窮苦學生點俾得起錢食吖…

所以我都係掉埋心水去試下芒果梅酒係咪真係咁正!而當日我去到鋪頭,都已經有唔少人喺鋪頭揀緊酒,我就梗係拉住我朋有去試左酒先決定買唔買芒果梅酒啦!

tasting

(由左至右分別係,芒果,柚子,士多啤梨,蜂蜜)我一行三人,而試左嘅酒就有四款,柚子,芒果,士多啤梨同蜂蜜。而試完之後我地一致覺得柚子係最好飲,而且同其他味仲有分別,柚子味同梅酒真係好夾!如果我話飲落有少少似有酒味嘅柚子蜜,唔知你地會唔會明呢?芒果就比我想像中麻麻,唔知係咪當日芒果整得麻麻啦,我當時有少少覺得芒果味有少少似藥水,而士多啤梨係更加似藥水,反而蜂蜜幾好,淡淡地酒味加少少蜂蜜嘅甜味,即係再比柚子要冇咁甜。所以我地試完酒之後,就一人買左一支720ml嘅柚子味梅酒鎮宅!當然我屋企人知我要去和歌山就已經一早落定單要我帶芒果梅酒返去俾佢地試,我希望佢地唔會覺得麻麻地。咁當然我都買多左支柚子味返去話俾佢地知其實除左芒果之外仲有多一個唔錯嘅選擇啦!

lemon

檸檬味相片-之後我再喺鋪頭望多陣就發現原來仲有多隻唔錯嘅味道,就係檸檬味啦!雖然都係啲好普通嘅味道,但係我試左佢之後發現佢嘅酸味加埋梅酒係有另一種感覺,飲落又唔覺得似藥水,仲覺得似果汁,咁當然之後係會有酒味浮返出黎啦。所以我之後就好痴咁決定買支細嘅檸檬味返去鎮宅!我俾錢嗰時再望下啲酒桶,我發現柚子果然係淨得最少嘅,我聽店員講柚子味係最賣得嘅,然後芒果味銷情都唔錯,而相對檸檬味就得好少人會買,因為大部分都嫌佢太酸。不過店員就話佢個人係最鍾意檸檬味。估唔到我同店員嘅口味係一樣,都係咁非主流!

有興趣買嘅朋友就記得入Marina City啦!得一度有得賣量計梅酒所以我覺得你一定會揾得到。順帶一提,間酒鋪喺和JR歌手站旁邊嘅MIO入面都有分店,不過就冇賣柚子,芒果同檸檬味,有其他本地人鍾意嘅口味。例如杜如風有試過嘅凍結梅酒,至於好唔好買就睇多次和歌山嗰集你自己再決定啦。

順便一提,Marina City有個叫黑潮溫泉嘅即日來回溫泉會館,仲有個遊樂場,玩到攰的話可以去浸個溫泉嘆下架,仲要有靚景加有個露天風呂都只係收你1000円左右,真係幾抵試!如果我問我Marina City可以留幾耐,我諗一日一定夠你食曬同玩曬入面嘅嘢。

俾定黑潮市場個營業日曆你,咁就唔會摸門釘啦!
http://www.kuroshioichiba.co.jp/guide.html

仲有Marina City個官網!
https://www.marinacity.com/s/index.html

梅酒鋪:天水屋 酒造(鋪位好難解釋所以自己睇黑潮市場水牌揾啦)
http://www.kuroshioichiba.co.jp/store.html#page_shuzou

miluku@gmail.com'

miluku

90後一名,冇特別嗜好,只係比較為食,所以間唔中鍾意周圍搵嘢食。

More Posts - Website

高人指點

comments