見客如接客 No.17 晶石⋯⋯情緣!?

cc photo by flickr user Batya7, "JustHavingFun"

cc photo by flickr user Batya7, “JustHavingFun”

講咗咁耐形形色色嘅客人,係時候講下另一個重要群組,就係供應商。開得珠寶店,除咗要有客人上門,當然都會有好多供應商嚟搵我。而對住供應商,基本上係比較開心嘅事。又唔駛點睇佢哋面色,心情唔好就叫佢哋走。而且我係客呀!佢哋大部份都要氹我開心嘛,哈哈!

珠姐姐係賣寶石嘅供應商,又或者稱之為晶石啦。佢並唔係賣紅藍綠寶呢三種相對貴重啲嘅寶石,而係賣好多女仔都鍾意嘅白水晶呀、紫水晶呀、粉晶呀、碧璽、月亮石呀、蛋白石呢啲各式各樣嘅相對便宜嘅晶石,基本上一千幾百都可以有交易。 而呢啲貨都有一定market , 畢竟唔係個個客都次次一百幾十萬咁買野㗎,而且出席好多場合,都無可能次次同一套吧!好多客都信幸運石同誕生石之類,所以都會有好多人搵㗎!

珠姐姐個人其實幾可愛嘅,事實上佢係一位40幾歲嘅姐姐,屋企養咗8隻貓,本人有過4段婚姻。佢經常聲稱自己係13點,作為一個八十後我唔係好清楚13點係咩,wiki 解釋係 「用於形容人,亦會簡稱為十三,係個俗語,形容一個人性格或言行瘋瘋癲癲,舉止輕浮,做事大癲大肺,唔經大腦,通常用於形容女人。」噢,的而且確,珠姐姐經常令我好開心。佢本人就係晶石嘅生招牌,因為佢本身就佩戴好多晶石,所以佢啲朋友都叫佢神婆。而佢雖然年屆48但十分相信愛情,經常同我分享。

「Galie , 你做乜唔帶上次我叫你買嗰條粉晶,你唔好唔信我啊,」珠珠七情上面咁話,「上次我個朋友呀,唔講你唔信,我一送咗條粉晶俾佢,第日即刻有男人同佢搭訕,威力好強,我睇你無乜男人緣,而且唔單止招來桃花運,又可以改善人緣,幫你鋪頭增加人氣,生意都好啲啦,你實在好需要!」聽落好似好hard sell , 但佢風格係咁,基本上佢次次都有唔同嘅朋友唔同嘅故事,而佢一得閒就嚟搵我吹水。

粉晶又稱芙蓉晶或玫瑰晶,我覺得對愛情有憧憬嘅少女時代大家都有買過,到而家都仲ok㗎,粉紅色始終比較討喜,又唔貴,加上又有浪漫嘅傳說:相傳粉晶嘅粉色光是古希臘佛洛狄忒女神之展現愛嘅光譜,Troy嘅王子放牧時遇到女神,得到咗呢條有愛情預言嘅粉晶手鍊,而佢後來就見到令佢神魂顛倒嘅海倫,就一發不可收拾啦。其實就係一個老土故事,請自己睇<荷馬史詩>。

「咁你送條俾我啦,上次嗰啲我留嚟賣。靚嘅梗係用嚟賺錢。」我向佢攤大手板。

佢完全唔理會我,「真㗎,佢帶住第二日喺巴士度就有個男人坐佢旁邊呀,問佢有無男朋友,仲問佢攞電話㖭呀!之後佢仲同佢交換咗電話而家約會中㖭呀!」好似少女咁嘅對話,就係佢經常同我講嘅野。

「係唔係做保險㗎個男人,定係做推銷之類,有無睇警訊㗎你哋?呢個年紀仲咁單純。」對住供應商大部份時間可以暢所欲言,而且唔駛經常討論好有品味嘅生活,真開心。我鍾意活得咁local !

「先唔係,人哋好認真,態度誠懇又日日whtsapp 同打電話俾佢,可能會步入教堂㗎!」嘩諗得咁長遠,有咁易咩,而家啲男人邊有以前咁有耐性慢慢追你,約你2、3次唔應約佢就同你Bye Bye 啦。但我見佢一臉夢幻又覺得好有趣,就係因為對愛情咁夢幻佢先會結咗4次婚吧。

不過,佢講得太興奮,自己講完就走人,完全忘記叫我入貨。

三個月後嘅某一日,珠姐姐又到訪,竟然再次提起佢呢個朋友,「Galie 我同你講,我個朋友真係要結婚啦,你係唔信我,講咩警訊,」佢沾沾自喜,好得戚咁望住我,「你如果聽我講有帶條粉晶,話唔定今日到你閃婚啦!」

「吓,係咪真㗎?究竟個男人係咩人?巴士情緣喎。」嘩係咁神奇我即刻帶住條粉晶手鍊先。

「做生意㗎!我朋友48歲第一次有人同佢求婚,佢都唔知幾感動!所以佢哋已經去咗註冊結婚啦!」珠珠一臉興奮,「雖然係有啲文化差異,不過我相信真愛係可以衝破文化界限嘅!」

「哦,外國人應該會浪漫啲啩!文化差異可以慢慢融合啦!」我見我幾個同學,嫁俾法國人同美國人,都比香港男人浪漫好多。

「咁又唔知喎,未試過有人嫁俾非洲人,佢係第一個!」

「吓!?非洲人?」嘩!我又真係無朋友嫁俾非洲人喎⋯「咁佢究竟做咩生意?」

「佢係重慶大廈賣電話㗎!」

「噢你朋友做咗非洲家嫂!恭喜恭喜!佢男朋友會唔會係嗰啲落難非洲王子嚟香港尋求政治庇護嗰啲?可能佢咗王妃喎呢次!」

雖然我就對非洲王子無乜興趣,不過寧可信其有,我決定由而家開始都帶住條粉晶手鍊,旺一旺我啲桃花!

Galie@Jewellery.com'

Galie in the Jewellery

因為錢而熱愛工作,生活沒有那麼多原因。

More Posts

Follow Me:
Facebook

高人指點

comments