請諗下關愛座嘅感受

圖片來源:作者

圖片來源:作者

自從人類有左智能手機,「全民記者」彷彿係城市人嘅新特權。每當社會上出現一啲佢地唔順超嘅事,就拿拿淋舉起手機拍片影相留底,再拿拿淋upload上網俾大家公審。呢個社會現象俾左一個方便免費嘅渠道俾任何人去做「正義」嘅一方。而好多喺無手機年代被容忍嘅行為,今日通通都有機會令你變成youtube紅人。

因為呢個原因,我覺得香港人近年開始變得神經質:明明只係做一啲由心而發嘅事,都好似僞人要活喺鎂光燈下咁就住就住,或者直頭唔做就唔會錯,其實都幾抑壓…其中一樣個人認為幾癲嘅就係關愛座。

自從地鐵巴士有日好煞有介事咁加左幾個有笑樣嘅奇怪座位,人類嘅道德倫理觀好似被一夜扭轉咁。結果出現一啲好極端嘅人:有人覺得既然叫得關愛座,梗係長期留俾啲喺個牌度show出黎嗰啲人坐啦,你未夠65歲,又唔係3歲以下,又唔係大肚(大肚腩唔計)又有手有腳,學咩人坐關愛座呀?哦!你坐!影低你放上網先。好啦,到真係有人因為坐左落關愛座而俾人影相放上網批鬥,大家為左避免成為箭靶就直頭有位都唔坐(就算方圓兩米內無任何65歲以上3歲以下身懷六甲) ,結果關愛座變得生人物近…

喂但係位擺出黎唔係用黎坐架咩???試下代入個位嘅角色:我--關愛座作為一個座位,日以繼夜承受各式三尖八角嘅pat pat,雖然難頂但都想証明自己嘅價值,我無諗過有一日會被呢堆日見夜見嘅pat pats孤立,明明係空嘅但竟然無人坐?!喂我叫關愛座喎,個名咁人畜無害唔係應該好受歡迎咩?點解你地明明比左錢但都唔好好運用我呀???我生出黎都係為所有人pat pat服務架!!點解要咁標籤我淨係可以俾某啲人坐喎!!!大家,黎啦!黎親近我多啲!無論你對pat pat 大定細老定嫩,我都可以同鄰居三個位一樣,好好咁承托佢地,直到你搵到一對比你更需要我嘅pat pat,再將我輕輕讓出吧……仲有,咪再用鏡頭對住我!我只係一個盡責嘅座位,唔係比你用黎網上批鬥呃like嘅佈景板呀!坐我嘅人無錯架!錯嘅人係曲解關愛座意義嗰啲契弟!!!

咳唔…總之,想坐就坐啦……做人做到連想坐下都要諗過度過驚餐慒,成日嚇人又嚇己好易捽死架。

(編按:作者畫得好得意~like啦like啦~)

妄想男子

現實生活太悶太認真,所以成日妄想。明知實現唔到,但畫下講下都得掛…

More Posts

Follow Me:
Facebook

高人指點

comments