Billund 有全世界最舊的legoland

所有圖片來源:作者

所有圖片來源:作者

今次grad trip嚟到Denmark,飛邊個機場一如以往係睇廉航頭⋯⋯佢去邊個機場我就飛邊個,反正去到一定有transport帶我出市區去酒店。最平果間廉航早機去丹麥只去billund,咁咪billund囉。仲記得張機票係果陣復活節假trip同trip之間,喺房同朋友快手快腳買(平到嘔,來回廿幾鎊真係去澳門都要呢個價,返香港望住airasia會覺得佢好貴⋯⋯),所以買晒機票酒店就即刻睇返果陣幾日去就去,個trip有咩玩,一直無理到。呢個trip直到起程前2日,考完試book火車飛,又大頭蝦book咗direct飛去,少咗一個我同朋友都好想去嘅城市,勁sad,不過我相信遺憾造就重訪嘅動力,我會再去Odense的。

因為七點機,最後又係睡眼惺忪搭通宵巴士去機場,飛到去billund一朝十點,機場告示版寫住機場四公里外就有Legoland,入場300幾DKK(1 DKK ~ 1.2 HKD),好鬼貴,但係兩條友童心未泯無去過倫敦同馬拉果個,一場嚟到lego嘅發源地,Legoland近在眼前,咁去啦,即刻放低行李係機場就搭車入去玩。

FullSizeRender

買完飛入場,拎起地圖一睇,嘩咁鬼細⋯⋯海洋公園山上果舊嘅一半都唔知有無。咁好啦,比咗300幾DKK唔好蝕,諗住乜都玩玩返夠本。點知好多都係海洋公園個兒童王國,人地五歲去排隊,你老人地幾倍都去排隊,又好似太誇⋯⋯有個細路比我拖住都話,一個人高人三個頭都去排真係嚇親人⋯⋯咁算,去睇吓啲4D電影,即係disney個米奇幻想曲(我十年無去香港disney,唔知有無改咗名)睇完又去吓水族館睇吓魚啦,又覺得自己由米奇幻想曲一下子去咗威威劇場⋯⋯

IMG_8190

IMG_8191

之後緊張嘅時刻嚟到,玩機動遊戲。小妹就真係好虧嘅,太勁離心力果啲我會覺得好辛苦⋯⋯唉我都想勁啲,喺哥本哈根睇人玩得好開心,但我知我上去玩真係玩完可以入廠。上年去巴黎disney見到有鬼屋就好雀躍(事實係我鐘意玩鬼屋,但係會喊到痴線),入到去坐低扣好安全帶,架野每升高一層就開一開門有啲恐怖野睇,心諗輕鬆啦,我係咁遠望點會驚。點知升吓升吓,一開門,嘩GG係望咗出去見到disney全景,救命個腦都未load到原來係跳樓機我已經跳咗落去⋯⋯嚇死我。自此好有陰影,點知今次惡夢又一次重演。

唔洗排隊就衝入場入去玩啦,一入去嘩吓,迪士尼黑色世界level⋯⋯行完之後果然又係叫你坐低,今次醒水知係跳樓機,但係有咩用呢,咪又係硬住頭皮坐上去?其實今次只係青蛙跳樓機高多少少,但係我太耐無玩,佢一跌果吓我又放聲高叫⋯⋯玩完之後隔離個細路好驚咁望住我⋯⋯ -_-

之後有另一個一見到有好steep嘅向下衝,即刻同我朋友講:「嗱,我唔玩得呢個,入硬廠。」再行遠少少有一個係star war theme,今年先起好嘅,咁朋友話新野喎要試吓,咁捨命陪君子啦我比咗300幾DKK⋯⋯ 排隊果陣個哥哥見我地咁大份就話坐唔坐第一排呀,我朋友就想嘅,但我就腳都軟埋話no no no I cant manage… 死都要行去中間 -_- 。上到去玩係普通過山車,玩到一半入一個隧道突然停低。我朋友話:「嗱,預備啦預備加速! 」我信晒佢即刻有晒心理準備會衝出去,點知呢⋯⋯ 唔係囉,但係又叫到我死。 你地自己去感受啦,係估你唔到嘅。

玩完呢個真係嚇到靈魂出竅,周圍行吓睇吓野影吓相,見到個天好光以為好早,但係六月中係北歐日照最長嘅日子,日日十點先黑,四點天光就會被燦醒⋯⋯

如果去開丹麥去玩啦,如果鐘意lego更加要去,同埋一定要玩最新果個過山車,感受吓我當吓嚇到鼻哥都無肉嘅感覺。

ding@ding.com'

dingding

最後一年留學,瘋狂打工攢錢再瘋狂浪遊。

More Posts

Follow Me:
Facebook

高人指點

comments