營多撈麵哲學及烹調圖解示範

所有圖片來源:作者

所有圖片來源:作者

營多撈麵呢隻窮人恩物,我諗大家就算未食過都一定聽過。以前住 hall 每逢去到 1) 懶得煮好野 或 2) 窮到出汁嘅 moments,營多基本上係不二之選。一條五包營多賣幾蚊頂到一日三餐,聽落係好瘋狂,事實上又真係試過咁瘋狂,真係可一不可再。

而雖然呢樣野賣得平,幾分鐘到十分鐘就煮好,但都要學食神話齋,要拎個心出黎煮。認真對待有限資源,將佢發揮到最淋漓盡致,亦都係食以外嘅一大樂事。

響真正開始之前,先講解我個人對煮營多嘅三大原則:乾身、勻循、簡便。頭兩個好簡單唔駛講。聽聞唔少人會額外加野落去(最常見係蛋),對於呢點我就有保留。講真,我夠知加多啲野會好食啲啦(加隻龍蝦落去丫笨,實好食架),但加太多花巧野未免就會違反左營多嘅原意,其他加料食物亦多少會搶走營多嘅味道。所以,少少調味 OK,太多就唔推薦。「簡便」就係咁嘅意思。

先決定份量:一個係醫口痕(多數情況係食完更加口痕 -__-|||),兩個係正餐,三個係飢荒。基本上我九成時間都係兩個,今次示範都係煮兩個麵。

◆ 步驟一
煲水,開麵,唧醬——唧之前用廚房較剪剪開包裝,齊口易啲處理。勿怕污糟,把較剪最多之後再洗。粉同炸洋蔥千.祈.唔.好.落.住。
3 (1)

紅色果包辣醬怕辣可以唔落,個人口味係煮兩包麵落一包辣。至於果包油,可適量地將油隔走,當然你鍾意飲油我唔會阻止你。
2 (1)

◆ 步驟二
將啲醬落晒落碗底,手持碗打側約 70° 慢慢轉,等啲醬均勻地分佈。
4

◆ 步驟三
呢個時候應該差唔多水滾。等到水滾就落麵,記住如果食兩個就要兩個一齊落。

◆ 步驟四
過程中要用筷子撩下,確保所有麵都浸響水入面。要煮幾耐視乎口味,我呢啲鍾意麵身偏硬嘅由落麵到熄火兩分鐘內好收工。

◆ 步驟五
熄火,倒水。用絲網筲箕 / 手 / 筷子隔住個麵,將煮麵用嘅水徹底倒走。之後倒個麵落隻碗度。
5

◆ 步驟六
落粉,撈勻。最理想係每條麵都要沾到醬,記住夾返舊麵嘅內部出黎。你有做到▲步驟二▲的話,撈下捲下唔駛幾耐就勻。
6

◆ 步驟七
落炸洋蔥,另外可隨個人喜好適量加料(麻油,黑松露油,七味粉 etc),但唔好太多,否則就會搶走營多本身嘅味道。
7

◆ 步驟八

趁熱食!

Amethian

熱愛創作,討厭庸俗的作者、攝影人。標準的水瓶男,對父權主義有種莫名的厭惡。攝影是寫作以外的一大興趣。對足球有股狂熱。夢想遊覽各地中小型城市,感受觀光區以外的風土人情。

More Posts - Website

Follow Me:
FacebookFlickr

高人指點

comments