《婚姻這種邪教》劇後感之粉紅色的雨傘

認真講我之前係沒有睇過呢個故事的,好簡單,因為我唔係xanga 年代,小學年代我寫blog只係純粹for making fun with friends。我絕對地唔係史兄第一代讀者,但我有媽咪級網友係,我睇左第一場之後po左相,她就講好懷念xanga,又已經戒左用Facebook,於是我就有了送她一篇文的念頭。

黃色雨傘尤如不能破除迷信的和理非非符咒,就讓我就配一把粉紅色的傘來襯托各種各樣歷盡風雨飄搖也許開花、也許百年好合、也許花已凋零的愛情,但好似沒有得『戀』就係一種缺失。

圖片來源:作者

圖片來源:作者

最近,我承認我有改變,但只係變番以前咁謝,唔通好似雨革個排頹tee、老牛、眼袋,仲要冇涼沖咁話喇wo。可能佢地唔慣啦,其實我一向都係咁,買童裝當cop tee咁著,鍾意歐美街頭風格,因為係夜貓,為左掩飾下所以makeup。身邊嘅人就好期待,但又唔敢問,終於有個勇士可能就問「你等陣去邊呀,你約左邊個呀?」可能都同佢地多女校出身有關,佢地都有著落,好似我冇就唔係幾好咁。
其實呢就真係冇咩好緊張兮兮的,有時候都對住佢地好奇的目光,我都唔知可以講咩。
就算真係有,so?
皇帝唔急,太監急黎有屁用。

真的,女人需要被寵愛,但係愛一個人愛到癲哂,迷失了自己。我最睇唔過眼嘅係個種拍左拖,成個世界就得番對方,事事擺左佢優先,我明嘅,兩個人一齊個種有人視自己獨一無二的感覺是好重要,至少女人係咁,唔係都唔會勁痴身又好執著你覆佢msg。

到左一個睇下邊個做衰人,邊個最後忍唔到對方的遊戲。又係何苦呢?你蠃了世界,但你沒有一個人讓你留戀世界,有甚麼意義。

最近開始對自己的年齡有種自覺,並唔係個種話要搵個人照顧自己呀,想要有個膊頭呀。我會諗人地究竟鍾意我咩?如果我個樣再平庸點,如果我唔打扮,如果我爛面又爛陰(咪亂諗,講緊瀏海),如果我戴番我副大大方方的眼鏡,如果我再任性一點,如果我再老一點,如果我再蠢一點,係咪會更容易搵到個份我好想得到的幸運。

聽完一個講法:
男人,二十歲鍾意十八歲。
三十歲鍾意十八歲。
四十歲鍾意十八歲
五十歲鍾意十八歲。
到七、八十歲都鍾意十八歲。

咩佢地個女人真係除左個樣同個west之外,就真係咩都冇喇,咁簡單洗咩咁辛苦戀愛。That’s all? 咁怪唔知得會有人買「人偶」。

我同身邊的朋友都有一種迷思,點解、點解佢咁既屎樣都可以拍度拖,仲咁開心,點解嘅?

但人愈大愈明,與其做個種騎牛搵馬,與其做個種「梗係點都搵個鍾意自己多啲嘅人」,不如不戀,煩少陣,反正已經夠忙。為左戀愛就接受一個人?真係work?

我有個朋友一d都唔港女,佢係好溫柔,好似大家姐咁照顧人既人。

上到uni 佢遇到一個男生,大家好好,開始有感覺,然後我感受到她等緊個個告白的moment,但係呢又好衰唔衰曖昧關係嘛,有得拖呀嘛。

然後,假期時女孩去左一個義教,番黎之後佢覺得自己唔應該係咁,我冇問她諗通左咩。
她:「冇哂,所有野都已成過去。我宜家甚至覺得佢點解咁煩,煩到呀媽都唔認得呀。男人黎架咪咁婆婆媽媽啦,我點答佢好,我唔想覆佢,我已經淨係覆表情符號同埋短句,我點樣先可以阻止佢同我講個樣野。我唔想沒有左個朋友,唔同以前喇,我同佢最好只是朋友啦。」「佢話過左個exam之後同我講一樣野呀,點算呀!我唔想聽呀!」「你知唔知佢點同我講,佢話我地好夾,不如試下拍拖三個月先啦~OMG.」

呢個時候,我有少少同情左個男仔,不過愛情勉強沒有幸福。但我都係幫個男嘅講兩句:「咁呀,宜家邊有人咁保守仲會同你試下拍拖先開始架,佢好有誠意wo。可能已經絕左種架喇。」

「你都唔明,有時候男人唔想女人痴身,我都唔想一個人廿四小時係度係咁問我做緊咩,三句唔夠就問我佢係咪做錯咩!佢冇錯!我都冇錯!係個timing過左就係過左架喇。」結局就係佢地仲係一個團體入面係好朋友,但沒有跨越好朋友的關係。

呢個時代能夠結婚的人真係同廣東話一樣就黎瀕臨絕種,我遇到太多人同我講有婚姻恐惧症。港女其實唔係想像之中咁恨嫁,只不過有時候係想免於一點麻煩,所以覺得都係結婚好。

「唉,其實個個都會失戀架啦,我都明佢有咩咁大件事。我家姐拍左十年喇,佢男朋友同佢求婚,佢拒絕左最後散左。」

「你錯喇,我見得多係男的好想有頭家,個女的唔想嫁,求左幾次,結婚戒指都買左,個女既竟然係fxxkbook度問自己男朋友搞乜、咪玩啦」

「結左婚又點呀,婚係要結嘅,過多幾年啦,不過咁,結完同宜家都唔會有咩改變,咪一樣係會玩,仲會同我女友或者到時係老婆分享下我嘅戰績,她笑嘻嘻咁鬧我賤人」

「都唔生仔,結黎做乜鳩呀」

好喇,我好想問下你地當自己伴侶係一個點嘅存在。呢個問題要唔要結婚嘅人都應該要答。唔好講話要結婚咁遠。他或她是如何待你好、待你差,為何你/妳仍然心甘情願留在佢左手邊。

我有過一個’horrible’嘅經歷,對一個認為人淡定有錢淨嘅人黎講,形容為horrible係一件幾咁荒謬的事了。我係套劇入面鍾意大申,因為似我,人總會喜歡係角色中與自己找相同,我覺得大申幾代表到我。

那一年大時大節,我地準備搞一個party慶祝,但party係其次,實則兩個月前我地就開始搞喇,因為諗著搞個驚世大求婚,喜上加喜。

我地訂banner,一個唔識樂器既人練結他練歌,我地開工廠手摺彩色玫瑰,當然我們一早就覺得佢地係差呢步謝,有咩可能會唔得呀。
有其他人聽到以為佢地其實已經過左呢段階段,老夫老妻啦。我地仲請埋一個有份量既人到時一齊做見證。
大學開始都成十三年了,兩個係對方初戀,穩定工作,人生有少少成就咁啦,同居左,家人見到厭喇,有埋我地一班好似囝囝囡囡咁嘅人。大家高高興興咁樣就過左兩個月。仲試著過套white suit,真係白到好閃,白老西、白皮鞋,全部突登買,仲要揀左好耐。
.
.
.
有早知,冇當初。
真係「祈求天地放過一雙戀人 怕發生的永遠別發生」

當年開始有wtapps但沒有telegram,冇secret chat,notifications 唔會有you have a new message。前一晚,我地係個wtapp 谷度傾聽日既野,好似係主角瞓著左,女主角睇到。

叫醒左男主角,兩個冇瞓一晚,傾傾傾傾傾傾。

最後男主角係谷度打左句取消行動。我地一大早仲要通知「嘉賓」冇個回事喇,「嘉賓」講左我心入面個句,「咩佢地完全冇共識架咩?」

冇plan過就咪鬼學人搞啦,chok下人地點諗先呀嘛。男人有時候就係單純過5歲細路,易哄又粗之大葉,幸福得太耐真係會變蠢,男同女都係

結果呢?我地party照舊,女方都有黎到,仲整好左野食,最重要個扎本來用黎求婚,有唔知幾多個人手汗既花呢,送就送左喇,不過呢就係變左present,影相個樣歡顏到成班人扮睇唔撚到,然後成班人為左令男主冇咁內疚,努力地玩得好開心。其實我地局外人係冇咩嘅。

不過,一、兩個月之後,佢地真係分左手。聽講係女方有偷偷地係出面認識(男性)朋友。咁之但係咁,咁都要聽下人地點講架嘛,但據悉男方好似咩都唔想聽,冇辦法接受女方破壞佢one life one love的童話。

超。

到最尾又咪係自私,自私咁唔理伴侶點諗就求婚,自私到根本沒有溝通過,唔係以為細水長流就真係眨下眼就知對方諗咩,人好複雜架wo。一個女仔好好對你有如丈夫,但結婚可能佢點都唔想呢。咁你就要了解下佢有咩心魔令佢唔想結。

不過都唔洗咁灰心,3年前集思會做過一個《第5代香港人-90後的自白》講六大特徵,第六樣就係「其實我地想結婚!」

89%接受唔到一腳踏兩船,56%以結婚為拍拖目標,61%想生兒育女,82%認為「年青人對社會及家庭應有責任和承擔」。

唔知宜家仲係唔係呢?

談談森哥
大家都會覺得佢係人渣,唔抵可憐,由頭到尾我只係覺得佢係一個小丑,唔算係人渣,因為佢以為自己玩緊人,人地係任佢擺佈,最後不是不報,只是時晨未到。「係時候喇」,「宜家唔結就要等下半年架喇」,講到結婚係佢人生一個checkpoint,佢只要畫就龜就得喇。俾我的話我唔會好似史兄咁好心架,識左十幾年又點謝,我會回一句:「條路自己揀,扑街唔好喊」『Which would be worse,to live like a monster or die as a good man?』 知唔知點解佢呢種人最後永遠都會失敗呢?

我就覺得好簡單,佢根本就係膚淺,只有工具價值,佢話joyce無腦,但好明顯佢咁多年黎一直利用人地愛他的優勢,一直利用人地既善良與包容他人誰沒過,但他就係咁。男人都係咁會『鳩痕』,問題係好嘅男人會避開,會節制,森哥就係送到上門,唔係唔食嘛。他們係鍾意打機架嘛,我遇過唔打機的男生真係可以5隻手指數得哂。就好似攻略遊戲,佢地未追到你之前,寧願做隻兵,on call36小時,追到喇,咪好似已經完成左的關卡咁,得到一些道具、一些技能,至於如何通關已經唔重要喇,前面仲有下一關。佢地挑戰你的忍耐力,森哥就係咁喇,知你會為佢退底線,咁即係佢仲有『空間』。

呢種人唔知道一生人唔係講一連串因果、感受或者抉擇,唔係你想點就點,其實生命是基於一連串的價值觀,仆街唔改自己點仆街,最後都只係一條仆街。

我認為史兄同佢wtapps 時講得最好的就是:「Joyce 同 Joycelin遇到你,係佢地嘅惡運,joyce同joycelin若最後能離開你,係佢地嘅福份。」一句道破幸福唔能夠依賴一個人,唔能依靠結唔結婚。人若果沒有價值觀或信念,好似史兄自嘲的說「只要個個人唔踩到我底線做朋友有甚麼問題」。人總有一點內心深處的介締,史兄知道左森哥佢欺騙自己同joycelin 係係影結婚相時先有bb 的,都未同森哥絕交,到左森哥講自己要同joycelin離婚喇,因為她同自己坦白交代個仔有可能唔係佢嘅,終於佢知道呢個人連用好好對待自己老婆同個沒有罪既細路去補償下自己的過錯都唔可以。

神是萬能,但耶教徒總是唔明祂唔是有求必應黃大仙,咩都應允你的慾望,你沒有成長又沒有經歷,你隱藏你的傷口,自己都唔坦誠面前神,你番咩教會,你講咩宗教。婚姻亦是如此,你們歷盡艱辛,做咁大場結婚大龍鳳,結果原來你根本沒有理由都沒有慾望結婚。

有人就好似joyce咁覺得有小寶寶或者結婚之後所有事情就能夠一筆勾銷。

我認識嘅女人係最記仇嘅動物,算鳩數啦!邊忽咁偉大,做人呀媽就話謝。joyce只係時間醒得恰恰好咋,好彩咋。

男人心入面最重要的可能都只有她,佢老母。

「沒有歌 怎敢說心事
受了傷 始終怕別人知
我和你吻別 在無人的街
張學友唱出我的情節

沒有歌 怎敢說心事
受了傷 點首更絕情詩 (始終怕別人知)
你的背包 讓我走的好緩慢
陳奕迅那首歌 是唱得他自己」

所以《相愛很難》

某日偶遇一對散步的老夫婦

圖片來源:作者

圖片來源:作者

葉靖怡

90後,一名前線尚且生存下來的女生,偽文青。在這亂世中只想做一個正常有良知的人 Everything is debatable. But when you stand for something, decisions are obvious.

More Posts

Follow Me:
Facebook

高人指點

comments