異端邪說之:比國慶更國慶既日子--關於澳洲嘅ANZAC DAY

剛才路過西澳洲立圖書館,見到外面嘅空地有軍車展,展出嘅係呢款二戰時美國設計制造,然後廣泛被盟軍包括澳洲軍方採用嘅M3 Stuart 「斯圖亞特式輕戰車」,難得地佢開埋個內膽比人參觀。再見到一街著住軍裝掛住勛章嘅軍人,仲有軍樂隊表演先醒起,今日係澳洲嘅ANZAC DAY,中文可以譯作「澳紐聯軍紀念日」。對於澳洲嚟講,係一個比國慶更國慶嘅日子。

圖片來源:作者

所有圖片來源:作者

10426707_10203456227800351_3227204541028067276_n澳洲嘅法定立國日,即係國慶呢,應該係1月26日既,係為左紀念1788年1月26日,由總督阿花.菲臘海軍上將(Arthur Philip)帶領有「第一艦隊(First Fleet)」之稱嘅首批殖民船團抵逹澳洲呢片所謂「無主之地」,昇起不列顛帝國國旗,正式宣布佔領。

一如中國自古有「發配邊疆」、「刺配充軍」之說,就係指將重犯流放到荒無人煙、放你都唔生嘅國家邊境,作為免費勞力強制勞作去開發邊境。當時嘅澳洲就係被視作大英帝國既罪犯流放地(convicted dumping ground),「第一艦隊」上載住嘅,超過八成係罪犯,係作為殖民地開發嘅免費勞力。噤樣嘅傳統超過百年,亦都決定左澳洲早期嘅英系移民既人口結構,基本上就係由罪犯、低技術勞工、村夫同無業遊民組成,喺澳洲呢片廣闊既領土上散收收噤各自為政。

直到1901年,澳洲幾塊殖民地嘅督爺坐埋一齊,圍威喂咁就組成咗澳大利亞聯邦政府,同美國既獨立戰爭唔同,過程水靜河非,無戰爭,無神話,無英雄,對於當時班澳洲村夫嚟講,連第一任首相係乜水都唔知,成個聯邦政府嘅存在感近乎零,就更加唔會有人去思考自己係「澳洲人」定係「英國人」呢啲食飽飯等屎屙嘅問題啦。

情況一直維持到第一次世界大戰爆發,英國大佬吹鷄參戰,做細嘅澳洲軍自然立架撐跟上,喺當時仲係鄂圖曼土耳其帝國領地嘅加里波利(Gallipoli)打咗場符祿的血戰--戰略上,後世史家認為加里波利之戰不但無助戰局,仲浪費咗人力物力拖長戰事,另到戰爭波及嘅範圍更大,拖跨咗俄國,俾列寧既蘇共乘機上位。戰術上,澳紐聯軍喺當時海軍陸戰隊嘅概念仲未成型,相關技術落後嘅情況下冒險深夜發動海灘登陸戰,結果盪失路,登陸地點由淺灘變懸崖。一場簡單任務結果演變成一場七萬幾人死,九萬幾人傷嘅無謂血戰。

成班澳洲村夫們喺度打生打死,恃住爛命一條,往往身先士卒,竟然打出左澳洲嘅國格出黎,然後先至發覺,佢地係一個命運共同體,係一班無論喺語言(主要係口音)定係文化(佢地已經係澳洲出生嘅英系移民第二或者第三代)都已經有別於正統嘅英國人嘅「澳洲人」。亦即係話,立國15年之後,呢個「國家」嘅概念先喺呢場符祿之戰入面由八千幾個澳洲人嘅命打咗出嚟。

澳洲嘅「佬」式文化就喺咁嘅背景之下,成為國家傳說,幾分單純,幾分天真,幾分率性,有啲衝動,講義氣,爛命,又帶住少少鄉下麻甩嘅佬味,成為澳洲人嘅典型人格。開口埋口就「mate」互稱。一如我地嘅「老友」、「手足」,係澳洲男人之間最慣用既麻甩用語(澳洲女人甚少用)。由此而遣生出黎嘅「mateship」即係相對於英文「friendship」泛指友情而特指果種男人之間麻甩嘅情誼,而寫入澳軍既軍訓之中:「honour, compassion and honesty, mateship and teamwork」,用我地嘅說話就變成:榮譽,憐憫,誠實,「麻甩」及團隊合作~~XD

一場無意義嘅戰爭,加埋一班率性義氣,英勇熱血又無辜嘅佬,足以拍成一部反戰嘅後現代式悲喜劇。每年就被澳洲政府大力宣傳,作為確立國格,維繫人心嘅國家傳說。然後一如其他自由社會一樣,有人贊自然有人彈,特別係左翼反戰嘅學者,更加不失時機地嘲諷嘅嘲諷,抽水嘅抽水,閙個不亦樂乎,花生四起。再配合上當下全球反戰嘅大氣候,所以就連立場傾右嘅西澳日報( The West Australia)ANZAC DAY紀念特刊嘅編首語,為咗政治正確,都要小心翼翼咁:「我們不是要美化戰爭,而是要去榮耀那些幾乎莫明地作出犧牲的無數年輕生命(But we should remember: not to glorify war, but to honour the almost incomprehensible sacrifice of so many young life)」

呢個就係澳洲。

(編按:見facebook原文https://www.facebook.com/mingming82/posts/10203456442125709?pnref=story,邪哥是一位很有趣的人~)
—————————————————————————————————–
(此乃吹水文,非嚴謹學術論文,如觀點、資料有誤,歡迎指證)
參考資料﹕
First Fleet
http://en.wikipedia.org/wiki/First_Fleet
ANZAC DAY
http://en.wikipedia.org/wiki/Anzac_Day
Battle of Gallipoli
http://en.wikipedia.org/wiki/Gallipoli_Campaign
Mateship
http://en.wikipedia.org/wiki/Mateship

ming@ming82.com'

黃邪

黃書最好讀,

邪性最難馴。
Blog: http://wongchea.blogspot.com.au/ (見下)

More Posts - Website

Follow Me:
Facebook

高人指點

comments