究竟日本留學生又係食啲咩嘅呢?

大家似乎對西方飲食文化同香港留學生嘅差異有興趣啲,無他嘅,正常都有cultural shock吖嘛。小妹GPA啱啱炆邊夠去exchange,咁啱又minor日文,就去咗東京exchange。唔多唔少都有人問過下我,去個同香港差唔多嘅地方,你嫌錢多?而我總係一笑置之。如果你覺得exchange一定要去一個樣樣都唔同嘅地方先有得著,你就太過膚淺喇。

不過呢篇係講飲食嘅,入返正題先。唔同人有唔同嘅飲食(同洗錢)習慣,而留學生活喺大城市嘅小妹亦不例外,要有一套自己嘅理財哲學。同去其他外國exchange嘅人唔同,東京係出名搭車方便之餘又快嘅地方。係貴啲姐。(註2)生活喺大城市唔想同世界脫節,就總係想出街睇多啲知多啲識多啲,觀察多啲呢個地方。嚟過日本exchange,知返邊度有好野食玩買其實一定無壞。就算第時唔係益自己,益下親朋戚友都好。所以我無選擇日日喺hall煮飯仔,反而有個平衡食飯購物兩得意嘅撇錢plan。無論係香港定東京,我都習慣weekday每日洗五十、weekend最多兩日夾埋洗五百,如此類推,喺日本就係一千同一萬(我指yen)。眾所周知日本其實生活指數都係高過香港,所以食所謂好野一定係貴過喺香港食,食餐牛角你就知。仲要有稅呢。(註2)

(所有圖片來源:作者;除帆立貝照,Photo Credit: Grace, 執相:作者 )

牛角,嚟咗之後食過第一餐嘅貴野,最平嘅set連飲み放題3268円(連稅)(無錯零頭都記得,嚟咗之後餐餐都有mark數)

所以,出街食野,尤其一個人食嘅話,一定係食呢啲。すき家、松屋同吉野家一定唔少得。仲有殺你呀(無錯,去到日本都係食殺你呀,不過係平過香港)、ガスト、Denny’s都係平平地嘅選擇。唔洗驚,入面成間野都會充滿住一個人食飯嘅人,you’re not alone,反而顯得一啲都唔毒,太過正常。

すき家鉄火丼大盛,620円(連稅)

於是小妹嘅食飯計劃係咁嘅:星期一至五除咗dayoff都喺學校食lunch,星期六日通常食個包做晏,而晚餐就煮兩晚食四晚,一晚食頹野(即係上面果堆,或者便利店搞掂),淨低兩晚,通常喺星期六日,就會出街同朋友食好少少。學校食lunch其實好平,300零yen有交易又食得飽,衰就衰在無乜選擇姐。點為之煮兩晚食四晚?一個人份量咁難煮點煮啊,梗係煮兩晚份量啦,夠懶又方便。再懶啲可以點?學似我咁,做電飯煲達人啦。話說日本有個YouTuber專教人整電飯煲一煲過嘅菜式,雖然我都只係試咗其中一味「黑啤飯」,但係又幾好味咖喎。大家不妨都試下:

自製加料蕃茄飯,連材料大概250円一餐

自製加料蕃茄飯,連材料大概250円一餐

學校canteen咖哩吉列豬扒飯,390円(已經係入面最貴嘅咖哩飯選擇)

至於便利店,相信唔洗我講大家都知日本啲便利店有幾多野食嘅選擇,上至飯團下至便當炸豬排一應俱全。而所謂頹野,其實係好味得嚟又平,賣相又夠呃like,分分鐘仲平過自己煮,何樂而不為呢。至於食好野,燒肉海鮮鋸扒等等都係貴得嚟又抵嘅,中伏機率甚少。雖然成日都會去到一啲充滿遊客嘅地方,令我都誤以為自己係一個遊客(?),但係有機會做一個長期居留嘅「旅客」,慢慢喺呢度覓食尋歡(我係講食物果啲食),又確實係享受嘅。所以嚟咗咁耐,我都真係好後悔以前喺香港洗咗咁多無謂錢,排隊又係差唔多咁耐,俾嘅錢又差唔多咁多,點解質素好似差咁遠。

學做架妹第一步,食好多好多甜品(兩間都係連鎖)

Cold Stone Creamery,最低消費500円,圖中食咗550円(不連稅)

Cold Stone Creamery,最低消費500円,圖中食咗550円(不連稅)

Jonathan’s家庭餐廳,圖中食咗460円(不連稅)

Jonathan’s家庭餐廳,圖中食咗460円(不連稅)

關於食,身邊朋友對我呢幾個月exchange嘅comment大致有幾種,分別係「你就好啦日日食好野」、「你到底係去食野定去讀書」、「你真係成個觀光客咁」仲有「你就好啦日本啲野咁平有排你食同買」呢幾類。食、玩、睇、買,確實都係我做咗好多、亦會繼續做嘅事。Exchange喎,唔係屎忽痕有得去咖喎,臨去我都仲chur咗個靚仔少少嘅GPA拎返少少scholarship,仲做咗幾個月full time儲咗錢先嚟咖喎。雖然過日本機票錢係平,以我所知十個有九個朋友過嚟exchange都係坐廉航,就好似身邊有啲一年飛幾次日本、入貨咁款嘅人咁,捕住啲機票promo嚟嘅,我自己都係。但係既然有機會喺度住半年以上,除咗食玩買又可以知多啲呢個地方嘅野,我就唔會坐定定喺度溫書喇(除咗日文啦,喺度學日文一定教得好啲,無辦法)。而選擇做一個「半觀光客」,無錯有啲地方好似浅草原宿呢啲個個遊客都會去嘅地方我都會照去(註3),但係用留學生身分去又確實係感受唔同啲喎,起碼我行步路都慢啲,又會係咪都講下日文咁。如果依家問我,其實感覺同working holiday無乜分別,given that如果你啲錢係自己俾啦下。確實錢就用咗好多,但係買野喺香港都會買嘅,玩又係,周圍睇又係,食野就上面講咗啦,實在有幾「歎」你都知。其實諗返轉頭,生活習慣同香港差無幾之餘,仲可能慳家咗添。(當然我唔同其他國家嘅留學生咁樣,機票錢又一大舊,食宿又貴一截啦,我機票錢分分鐘平過啲人喺香港食餐buffet)要了解一個城市,除咗做啲平時喺hometown唔會做嘅野(which is好多人咁諗)之外,最重要嘅其實應該係做返自己。用自己嘅角度去睇呢個新嘅城市,咁樣先係每個人獨一無二嘅exchange經驗嘛。好似係。而啲人話我食啲野好似全部都好好食喇喎,其實食野就睇你心情好唔好咖姐,喺度住得開心喇喎,食SU Can頹飯(註4)都覺得零舍好味啦。喺東京行步路都舒服啲,因為條路闊啲、車又少啲丫嘛,仲要啲樓一啲都唔高,風又大又涼爽,點同喎。

磯丸水產大大隻帆立貝,690円兩隻

磯丸水產大大隻帆立貝,690円兩隻

(註1)不過咁,待留學生不薄嘅係我地有學生車飛,返學條路中間出閘是唔洗錢的。如果好似小妹咁好彩,返學條路經正池袋同新宿,就可以慳埋weekend出去行街食飯睇戲嘅搭車錢啦!雖然咁樣唔代表唔洗俾錢,只係你要一次過買三個月嘅車飛,而每程個價又係平咗嘅,真正平幾多就無人知(從來無人計),只係搭車出街會無曬壓力

(註2)留學生係無得退稅嘅,因為通常最少都有六個月visa,要六個月以下嘅先可以搞退稅,所以買野食野都無平,你話,邊度似遊客?

(註3)特別係食好野嘅地方,小妹去磯丸水產嘅時候就發現,無論幾好食都好,聽住周圍台台都係廣東話或者國語都真係有啲講不出聲咁……

(註4)此處所指為港大學生會餐廳

ccchanfuyu@gmail.com'

F

凡人一個,追求快樂。知世界不完美,完美則不可取。世上另一個我:https://fuyusays.wordpress.com/

More Posts - Website

高人指點

comments