〔潮遊日本〕 鐵路神器。乗換NAVITIME

有睇開Facebook 專頁既都知我剛去完東京,而有唔少朋友仔都有私下問我野。有幾個問題,唔同圈子既朋友都會問到,咁不如一次過係到詳細講啦。我唔係咩日本旅行專家,去既次數亦唔多,只係將我既經驗分享下,有錯既請指教(戴頭盔)。

唔計機票同酒店,我諗最重要既就係交通。咁係日本搭得咩最多呢?我個人黎計就係鐵路。可以睇睇下面東京鐵路圖先:

Screen Shot 2015-01-27 at 2.15.32 am

係咪好複雜先?九萬幾條線不在話下,一個地方有幾個站口(好似新宿咁:有新宿東新宿新宿三丁目新宿西口南新宿西武新宿JR新宿等,唔同站口入唔同線路去唔同地方,好似旺角旺角東咁),又唔係互通果下先慘呀嘛!

咁點算好呢?作為一個現代人,Mobile App幫到你!今次想介紹大家用既係:乗換NAVITIME。我知呢個有website版,但係去旅行,緊係電話在手,天下我有,邊有人帶部電腦出街嫁?剩係想介紹Mobile App版點玩法姐(Website版既,我覺得適合做Planning時候用)。

1. 首先,大家要下載乗換NAVITIME呢個App:iOS版Android版。放心,免費嫁,呢隻App玩IAP (In-app Purchase),正常我地唔需要用。你會見到一開始會係咁:

IMG_1636

2. 最簡單用法,就係直接咁Search啦。首先,你要知道自己要邊到去邊到廢話,即係決定出發到著兩個點(想去某個地方,請先做功課去邊個站最方便)。好似我咁,想由酒店出發(新宿)去築地食野(築地市場/築地)就揀返相應既地點,好似下圖咁:

IMG_1637

3. 然後你係可以揀時間既。咁我通常都無咩計劃,緊係行緊去鐵路站先查下點搭車,幾時有車嫁啦。如果你好有計劃,預到自己幾多點要做咩,咁就可以揀日期時間,得出相對應既結果點解港鐵無。咁我扮哂野,想知我1月28號10:20去到新宿站,咁點去築地市場站呢?就要好似下面咁選擇:

注:日本既鐵路好嚴謹,跟足時刻表,所以基本上寫幾點有車,就係幾多點,走左班車唔好怨

IMG_1638

4. 揀好哂,就可以揀檢索。個程式Load一Load,就會話你知結果。
用返例子,比左3個建議我:
第一個:10:24->10:45(21分鐘),純鐵路,直達,267 Yen;
第二個:10:21->10:56(35分鐘),純鐵路,轉一次車,267 Yen;
第三個:10:20->10:57(37分鐘),鐵路加步行,轉一次車,368 Yen

聰明如你,點都係揀第一個建議啦。
不過等等先,第一個建議右面有3個符號,代表咩呢?
分別對應返快速便宜方便三個元素。係呢個例子就咁好彩,三個同時並存係第一個建議上,其他時候好大機會分開嫁。咁就睇你點揀啦。

IMG_1639

5. 決定左用第一個建議,就可以按入去睇詳情:
資料話,如果你要係10點20分,新宿站去築地市場站既話,就唔該你10:24之前去到新宿站6號月台(6番乜乜乜)搭都營大江戶線,向六本木,大門方向。上到車既話,10:45就到目的地。呢程交通,將會用你21分鐘,267Yen。

IMG_1640

係旅程入面,不斷重覆步驟2-5,八成情況都處理到。

6. 咁如果你唔識打個鐵路站名,或者想探索下咩站,有興趣就即去既,咁點呢?你可以揀路線圖,就見到成個鐵路圖出左黎。想去邊既,可以係最上面檢索,亦可以按實果個站名,選擇出發或者到著

唔確定自己近邊個鐵路站?按右下方既圖標(好似準心果個),程式就會定位話比你知(當然你要開定位功能…)。以我既經驗,通常都準既。

IMG_1641

7. 呀潮生,講咁耐都係東京,咁如果我去第二度咁點算?放心,呢個APP係咩地方都有,係地圖呢版,按左下換地圖果粒制,就可以揀唔同大地區。留意,第一次睇既話,需要上網下載地圖同資料落黎,小心唔好爆Data。最好連上Wi-Fi先好下載。

IMG_1642

好啦,簡單介紹就係咁多。希望幫到大家。

P.S.我知仲有其他網頁/App都做到同樣效果,咁我鍾意用呢個呀嘛。

下載乗換NAVITIME呢個App:iOS版Android版

潮童焗飯

透過食物,我們能認識世界 透過攝影,我們能了解他人

More Posts - Website

Follow Me:
Facebook

高人指點

comments